Vawiin khan Sports & Youth Services Department buatsaih Vaipuanpho Base Camp-a One -Week Adventure Camp chu Pu Lalrinmawia Ralte,Minister, Labour,Employment & Industrial Training in a hmunah tlawhin a khar.
Khuallian Pu Lalrinmawia Ralte chuan thu sawiin he programme-a tel te chu rilru huaisenna,paukhauhna, tumruhna,mahni thil tiha tihtakzetna, midangte nena nunho thiamna,chhelna,hun hman thiamna leh mahni inthununna tha tak nei tura a duh thu sawiin a fuih a.Mi huaisen,tum ruh leh chhel te an dinchhuah theih thu te, harsatna ni a lang hi hneh theih a nih thute, mahni phak tawk zelah mahni inrintawkna ( self confidence) neih leh nun hona ah mi dangte rin ngam thiam a pawimawh ziate sawiin sikul naupang lo telte chu tum fel tak nei turin a chah bawk. Khuallian hian Adventure chu Mizoram Sawrkar in thalaite hmasawnna atan leh ram hmasawnna atana a ngaihpawimawh a nih thu sawiin uar zawka kalpui zel tur a nih thute a sawi bawk.
One-Week Adventure Camp neih mek hi Sikul naupangte tan buatsaih a ni a,NPYAD scheme hnuai a Ministry of Skill Development, Entrepreneurship, Youth Affaire and Sports, Govt. of India in hetiang huaihawtna atana sum a pek hmangin programme hi kalpui a ni. He scheme ( National Programme for Youth and Adolescents Development ) hian a tum ber chu thalai leh tleirawlte nunkawng dik leh tha a hruai a ni a, chutiang atana hmanraw pakhat chu Adventure Programme hi a ni .Adventure programme chi hrang hrang hmangin thalai leh tleirawlte kaihhruaina tha leh zirtirna tha pek hi he scheme hian a kentel pawimawh tak a ni.
One-Week Adventure Camp ah hian St.Paul's Higher Secondary School, Mizo Synod Higher Secondary School,Marcus School of Education (Maubawk), Govt. Mizo High School,Gov't.Tlungvel High School,Lungdai Higher Secondary School atangin naupang thahnem tak an tel.
One-Week Adventure Camp kharna hi Pu Thankhuma,Deputy Director in kaihruaiin Pu Lalzirmawia Chhangte,Director-in he programme kamkeuna leh sawi zauna hun a hmang a, Pu Vanlalruata'n Technical Report a pe bawk.
