2170/2022-2023
Kolasib dated the 3rd October, 2022: Vawiin khan Kolasib District Secondary School Sports XVIII-na Kolasib District Sports Stadium Project vengah neih a ni a. Pu Lalrinsanga Ralte, MLA, Serlui Assembly Constituency chuan khuallian niin a hmanpui.

Khuallian Pu Lalrisanga Ralte, MLA chuan, infiamna ahte, zirna ahte hlawhtlinna chang tur chuan tumruhna, inpumpekna leh mahni inthunun theihna a pawimawh thu a sawi a. Tumna mumal tak nei chung leh chung thil tumte tih hlawhtlin nana tihtakzet a bei thinte tan hlawhtlinna a awm thin thu Pu Lalrinsanga Ralte chuan sawiin teirei peihna nei chunga hlawhchham chang pawh a beidawng mai lo turin zirlaite a fuih bawk a ni. Infiamna a tel tur naupang te pawh rilru thianghlim leh hrisel nei turin leh mahni inthunun a hlim tak a hun hmang turin duhsakna a hlan a, rilru hriselna piah lamah taksa hriselna chu zirlaiten an mamawh thu a sawi. Zirtirtu hna chu khawtlang leh ram tan a mi chhawrtlak leh puitling chherchhuah a nih angin rinawm tak a hna an thawh a pawimawh thu a sawi a, Kolasib District Secondary School Sports chhunga a tul apianga hman turin Cheng 50,000 a hlan bawk a ni.

Sports hawnna inkhawm hi Pu Lalngaizuala, DEO, Kolasib chuan kaihhruaiin, Pu Lalremsiama Varte in report a pe a, District Secondary School tin atangin Parade entir a ni. District Secondary School Sports ah hian Football, Volleyball, badminton, long jump, shot-put leh Track events a inelna te neih a ni ang a. Kolasib District huam chhunga School 27 telin ni 6.10.2022 (Ningani) thleng khian he sports hi a neih a ni dawn a ni.