2171/2022-2023

Khuangchawi thla ni 3, 2022: Nimin khan Lawngtlai Bawrhsap Pu Amol Srivastava hovin Lawngtlai DC Conference Hall-ah Agriculture leh a kaihhnawih Department hrang hrang telna District Coordination Committee ṭhut khawm buatsaih a ni.

He ṭhut khawmah hian District Administration official-te bakah, DRDA Project Director, DAO, DHO, DVO, DFDO, DO (LRS&WC), SDO (I&WRD) leh World Vision ai awhte an tel a. Lawngtlai District chhunga agriculture leh a kaihhnawiha hna thawh mek dan thlir ho niin, harsatna hrang hrang awmte a chin fel dan tur sawi ho a ni a. Agriculture lama hma laknaah hmasawnna leh thawh hona ṭha zawk a awm theih dan tur te sawi ho a ni.

Bawrhsap chuan hautak lo leh sum seng lova kut hna thawktute'n leiṭha an intodelh theih nan kut hna thawk chhungkuate'n mahni chenna in ṭheuhvah home composting kalpui tura inzirtir pawimawh a tih thu a sawi a. Hei hi a hlawhtlin theih nan a theih ang angin bawhzui ni se, tih a ni.