No.7232/2020-2021

Vawiin khan Serlui bialtu MLA Pu Lalrinsanga Ralte, Vice Chairman, Rubber & Allied Crops Development Board ni bawk chuan Vairengte-ah a bial chhung khaw hrang hranga chhungkua te hnena sem turin Plastic Tuizem 211 a vailiam. Bialtu MLA hian Vairengte Dumping Ground leh Vairengte CHC-a Morgue House a hawng nghal bawk a ni. Heng Tuizem a vailiam tak te hi litre 1000 dawng niin MLA Fund atanga sem a ni. Nikum 2020 khan Plastic Tuizem  hi a bial chhung khaw hrang hranga chhungkaw 185 hnenah a lo sem tawh bawk a ni.

Pu Lalrinsanga Ralte chuan tuizem  sem a nih chhan chu a bial chhunga mi harsa zawk ten tui thianghlim leh hrisel zawk an lo dah khawl a, thal tui harsat zualpui laia tui mamawhna phuhruk theihnan a nih thu a sawi a. MLA Fund chu chhungkaw tin thleng zo ni se a duh thu sawiin, mamawh leh tul dan azir zelin MLA Fund chu hmeithai, mi harsa zawk leh kut hnathawktute tan a tam thei ang bera hman a tum thu  a sawi a ni.

Rubber & Allied Crops Development Board Vice Chairman chuan Vairengte khawtlangin bawlhhlawh an paihna tur Dumping Ground siamthar chu vawiin hian a hawng nghal a. Pu Lalrinsanga Ralte chuan Vairengte in Bawlhhlawh paihna hmun tur tha tak an nei thei ta chu lawmawm a tih thu a sawi a. Vairengte chu Mizoram ramri depa awm a ni a, Bawlhhlawh paihna tur hmun mumal a awm loh avangin Highway kawng kamah bawlhhlawh hi paih mai thin a ni a. Hei hi mipui hriselna atan a that loh avang leh State pawn atanga Mizoram rawn luh tirh maia paih thin a nih avangin Mizoram hmel a ti mawilo hle thin a ni, a ti a. Bawlhhlawh paihna hmun tha tak an mamawh avangin Deputy Chief Minister zahawm tak Pu Tawnluia ruahmannain UD & PA atangin Dumping Ground tha tak cheng nuai 54 sengin Vairengteah siam a ni thei ta chu a lawmpui thu a sawi bawk a ni.

Vairengte CHC-a Morgue House, MLA Fund atanga sak chu Pu Lalrinsanga Ralte, Serlui bialtu MLA chuan a hawng nghal bawk a. Bialtu MLA chuan Vairengte chu Mizoram kawtchhuah pawimawh tak a ni a, State dang leh Mizoram hmun hrang hrang atanga zin vei vak ten vanduaina tawkin boral ta te an awm thin a. Chutiang hunah chuan mitthi ruang lo dah lailawkna tur a awm mai thin loh avangin khawtlang an buai phah fo a. Hetianga khawtlang mamawh em em Vairengte CHC-a mitthi ruang dahna tur hman theih tura a awm ta chu lawmawm a tih thu a sawi a, a theih ang anga Vairengte CHC chu tihhmasawn a duh thu a sawi bawk a ni.