No.7233/2020-2021

Covid-19 hrileng avanga phai leh hmun dang atanga hnathawhna rawn kalsana Mizorama rawn let te entrepreneurship chungchang zirtirna  'Entrepreneurship Development Programme on Livelihood Generation for Returned Migrant Workers' chu Mizoram District dangte rualin vawiin khan Lunglei District ah pawh LGC Multipurpose Hall-ah neih tan a ni a. Pu LH Rothanga, Principal LGC chuan khuallian niin he training programme hi a hawng. He training program hi Mizoram Youth Commission, Planning & Programme Implementation Department leh Commerce & Industries Department-te tangkawp buatsaih a ni.

Hawnna inkhawm Pu R. Laltanzuala, General Manager, DIC kaihhruaiah Pu LH Rothanga chuan thalaite hmakhua ngaia an tan training hlu tak buatsaihtu Mizoram Youth Commission, Planning & Programme Implementation Department leh Commerce & Industries Department-te chungah lawmthu sawiin training tura lo kal te duhsakna a hlan a. Hlawhtling turin educational qualification a pawimawh ber lo a ni tiin sumdawnna thinlung pua mahni thiam zawng leh tui zawnga eizawnna kawng dap thiam te, taimak, tumruh leh teirei peihte chu hlawhtlinna kawng zawhna atana thil pawimawh a ni zawk, a ti a. Training tura lo kal te chu eng hna pawh thawk hreh lo tur leh an thalai pui te tana entawn tlak nih theuh tum turin a chah a ni.

Entrepreneurship Development Programme hi ni 3 awh tur niin Mizoram sawrkar Entrepreneurship Development Scheme hnuaia Master trainer pathum - Pi Agnes L Khawlhring LGC, Pi C.Lalremruati DIPRO leh Pu R.Lalnunthara,HATIM ten zirtirna an pek dawn bakah Bank manager leh Industries Department atangin lecture neih a ni bawk ang.