No.7234/2020-2021

Special Summary Revision of Photo Electoral Roll 2021  neih zawh tak hmanga Electoral Roll thar ber Final Electoral Roll 2021 buatsaih chu vawiin chawhma khan Champhai DC Conference Hall-ah  District Election Officer Pi Maria C.T. Zuali’n a tlangzarh. Tlangzarh hnu hian Party aiawhte hnenah Final Electoral Roll Copy khat theuh a hlan nghal a ni.

District Election Officer Pi Maria C.T. Zuali chuan Special Summary Revision of Electoral Roll chu kum tina kalpui thin Vote nei tharte Electoral Roll-a an luh theihna tur leh siam that ngai leh a dangte buaipuina tura kalpui thin anih thu a sawi a. A hun taka Electoral Roll thar ber  peihfel anih theihna tura Election Officer leh Staff-te, ERO, AERO leh BLO  zawng zawngte thahnemngaihna chu fakawm a tih thu sawiin, anmahni tawiawma lo pui thintu NGO, khawtlang hruaitu leh Political party aiawhte chungah pawh lawmthu a sawi a. Hun hlu tak senga a tlangzarhna hriatpuia kalkhawm zawng zawngte chungah lawmthu a sawi bawk a ni. 

He hunah hian Pu Lalnunfela Chawngthu, Election Officer chuan Electoral Roll tlangzarh tak dinhmun tlangpui tarlangin Final Electoral Roll chu Champhai district chhunga Assembly Constituency 3 te tana buatsaih anih thu leh Khawzawl district a bet tawh khaw thenkhatte chu 23-Champhai North Assembly Constituency-ah an la awm thu a tarlanga. Roll hearing neihna hmunahte uluk taka document endik anih thin thu leh Economics & Statistics Department Champhaite nena tangkawpin document lem leh diklote zawnchhuah hna ngawrh taka kalpui thin a ni, a ti a. Kum hmasa lamah Birth Certificate lem siamchawp 47 lai an man thu leh kumin bikah Birth Certificate diklo 17 man anih tawh thu leh 36 dangte chu rinhlelha chhuizui an nih thu a sawi bawk a. Birth Certificate diklo hmanga Electoral Roll-a luh tumte chu   chhui zuia man sak zel an tum thu a sawi bawk.   

Special Summary Revision of Photo Electoral Roll 2021 kaltlanga buatsaih Electoral Roll 2021 thar ber tlangzarh takin a tarlan danin Champhai District chhunga Assembly Constituency 3-ah Vote nei mi 54655 an awm meka. General Voter 54227 (Mipa 26530, Hmeichhia 27697) leh Service voter 428 (Mipa vek) te an ni. Mipa voter aiin Hmeichhe voter 739 in an tam zawk a ni. Vote nei thar mi 1653 an awm a, kum 20-29 inkar vote nei tam berin mi 15817 an awm a. Kum 80 chung lam vote nei mi 686 zingah kum 100 chuang mi  4 an awm mek bawk a ni. Polling Station malah chuan Voters 1263 awmna 24/10-Bethel-II Polling Station, 24-Champhai South Assembly Constituency-ah vote nei an tam bera, 23/21- Keifangtlang Polling Station, 23-Champhai North Assembly Constituency-ah voter 91 awmin a tlem ber a ni. 

Draft Roll tlangzarh hmasaa vote awm 53120 atangin Final Roll-ah vote nei mi 1107 an awm belha, a punna hi za zela 2.08 a ni.  24-Champhai South A/C ah vote punna hi sang berin za zela 3.4 niin, a tlemna ber 23-Champhai North A/C chu za zela 1.1 a ni.  Champhai District chhungah Polling Station 84 awm mekin, Polling Station tinah voter 651 zel awm anga chhut a ni. MLA Constituency zingah 24-Champhai South A/C-ah voter 19774 awmin a tam bera, 23-Champhai North-ah voter 19392 leh 25-E.Tuipui A/C-ah voter 15489 awmin an dawt a ni. Form 6 kaltlangin Electoral Roll-a luh dil mi 2272 (Mipa 1088, Hmeichhia 1184) te dilna pawmsak an ni a. Form 7  kaltlangin chhan hrang hrang vangin Roll-a awm tawh mi  1167 (Mitthi-499, hmun danga insawn 649, Roll-a awm nawn 19) te paih an ni bawk. 

Election Commission of India-in a ruahman angin Special Summary Revision of Photo Electoral Roll 2021  neih zawh tak atanga dilna hrang hrangte leh siamthat ngaite chu chinfel anih hnuah  Final Electoral Roll 2021 hi tlangzarh a ni a. A hranpaa Electoral Roll tlangzarh tak mamawhte tan a Soft Copy copy  leh Hard Copy-te Election Office-ah lei theihin a awm a ni.