1224/2022-2023
Aizawl, 12th July, 2022 : SEDP hnuaia Saitual District land survey neih mekah hna kalpui dan leh hmabak la awmte thlir hovin vawiin khan Land Revenue & Settlement Minister Pu Lalruatkima hovin office ah Pu Rochhunga Ralte, SEDP LR&S Board Vice Chairman leh LR&S Department hotute an thukhawm a. Saitual district dawtah Khawzawl districta survey neih chhunzawm dan tur an sawiho a ni.

Mizoram district hrang hranga land record mumal tak nei turin Land Revenue & Settlement Department chuan SEDP hnuaiah ruahmanna siamin land survey hna hi kalpui mek a ni a. Saitual district hi pilot project ah hmangin sum Rs.52.81 lakhs sengin Buannel Geo Solution & Services te chu survey hna thawk tura rawih an ni a. Kumin April thla khan hna tanin tunah hian 50-60% vel thawh zawh a ni tawh a. Minister hova meeting chuan Saitual district land record mumal tak siam a nih theih nan survey hna hi enpui a, vil turin LR&S Directorate atanga officer intirh ni se, an ti a.Chumi rualin Saitual D.C pawh a district neitu nihna anga survey hna hi a tul anga lo enpui tura ngen ni se, an ti a. August thla chawlhkar khatna ah District chhunga VC te nen land survey chungchanga awareness programme nei turin ruahman a ni.

Saitual district bakah hian district thar dang 2 - Khawzawl leh Hnahthialah te pawh survey nei turin ruahmanna siam a ni a. Khawzawl leh a chhehvel khaw 13 ah survey neihna turin SEDP sum 95.80 lacs tihfel a ni tawh a. October thla ah hna tan theih turin inbuatsaih ni se, tiin vawiina meeting ah hian rel a ni.

Pu Lalruatkima chuan district hrang hranga land record mumal tak siam chu ram neitu te leh sawrkar tan pawh a pawimawh thu sawiin LCS leh Land Pass te chuan a neitute tan ram hlutna a tisang chauh ni lovin, leiman atanga sawrkarin sum a hmuh tur pawh nasa takin a tihpun an beisei thu a sawi a ni.