1223/2022-2023
Champhai, the 12th July, 2022: Champhai District chhunga zirna tihhmasawn tuma hmalakna kalzelah District Education Committee (DEC) ruahmanna bawhzuiin, District Education Committee (DEC) member-te chuan vawiin khan Champhai khawpui chhunga zirna in thlanchhuah 9 te an tlawh a, Sikul dinhmunte endikin zirchianna an nei a ni.

Pu James Lalrinchhana chuan DEC thukhawmin District chhunga zirna tihhmasawnna tura pawimawh hrang hrang a rel zinga Sikul-te dinhmun zirchian nise a tih tihhlawhtlin nana Sikul endik bultan a ni chu lawmawm a tih thu a sawi a. Inhauhna leh inzilhna lam ai mahin hamsawnna tur kawngah hmabak enge kan neih tih leh insiamthat ngaihnate enfiaha zir ho tura Sikul tlawh kual an nih thu a sawi a. Zirchianna atanga hmuhchhuahte DEC thutkhawm leh huna pharha a tul anga hmalak dan tur relho leh tum a nih thu a sawi bawk.

Zirna chu hmasawnna zawng zawng innghahna a ni a, Department hrang hrang thawhhona avanga tha taka kalpui theih chauh a ni, a ti a. Sawrkar Sikul-te chu zirna in tha, mi puitling tak takte chherchhuaktu a lo nih tawh thin dante tarlangin, Zirtirtute chu nakin lawka ram leh hnam innghahna tur Zirlaite enkawltu an nih avangin Zirlaite nunphung chîk fo thin turin a chah a. Mi invawng, inthununna tha tak nunpuia zirtir rawngbawlna zahawm tak chawinung zel turin a fuih a. Sikul inrelbawlna felfai zawk a awm theih nan thawhhona tha tak chhawmnung zel tur leh intuaithar zel tum turin a fuih nghal bawk.

Bawrhsap chuan Zirlaite chu thiamna nghet leh tlo neih tum tur leh nih tum mumal tak siam fel lawk turin a chah a. Spelling ngaipawimawh fo tur leh Zirlaibu chhung thu hre bela mahni irawm chuaka phuah thiam tum turin a fuih a. Harsatna Zirtirtute hnena thlen zel tur leh nuam ti taka Sikul kal thin turin a chah bawk a. Rualelna chang hriaa thiam loh an neihte zawh hrehlo tur leh Sikul tihmingthatu nih tum theuh turin a fuih a. Ngaihsan tur dik takte ngaisang a, lehkha chhiar uar thar tur leh ruihhlo laka inthiar fihlim fo turin a chah bawk.

District Education Committee Monitoring Team Member-te hian team thumah inthenin Champhai khawpui chhunga zirna in 9 te an endik a. Monitoring format, zirchianna leh tehfung hrang hrang duan zulzuiin endikna an nei a. Endikna hmang hian School chungchang kimchang, thawktu leh zirlai neih dan, SMC/SMDC leh hmasawnna ruhrel leh bungrua; School building, Compound, Classroom, Toilet, tui leh eng, Library, Computer, kut silfaina leh choka leh adang neih dante an enfiah a. Heng bakah hian academic activities, co-curricular activities, social work leh nutritional garden kalpui dante an enfiah a. Hrileng avanga zirna mumal taka kalpui a nih loh hnuah Sikul hawn a nih leh tak hnua zirlaiteah nghawng a neih dante leh raltlan zirlai neih dante pawh sawiho a ni a. Zirlaite hriselna leh hridanna lak kawnga hmalaknate pawh sawiho a nih bakah Zirlaite nena hun hmanho a ni bawk a. Monitoring Team-te hian an kalna school-ah monitoring note, Samagra Shiksha (SS) leh PM Poshan (MDM) te an ziak nghal zel bawk a ni.

Vawiin Sikul endiknaah hian DEC Monitoring Team-I, Deputy Commisioner Pu James Lalrinchhana kaihhruaiten Govt. Vengsang Middle School, Govt. Primary School-I, Kahrawt leh Govt. GM High School, Vengsangte an tlawh a. Addl. DC Pu Henry C.Lalrawnkima kaihhruai DEC Monitoring Team-II ten Govt. Roseland School, Vengthlang, Govt. Vengthlang Middle School leh Govt. Champhai High School, Vengthlangte an tlawh a, DEO Pu TT Laltanpuia kaihhruai DEC Monitoring Team-III ten Govt. Bethel High School, Govt. Bethel Middle School leh Govt. Primary School-VI, Bethel Vengte an tlawh bawk a ni.