1222/2022-2023
Dated Serchhip, the 12th July, 2022: Vawiin khan Serchhip District Level Monitoring Committee on Implementation of JICA on National Highway-54 members te chuan Serchhip district chhunga NH 54 laihzauh hna thawh meka leivung an paih dan endikna an neih chhunzawm leh a. NHIDCL hotute leh an hnuaia contractor ten an hnathawh meka thil fel tawklo awm nia an ngaihte an sawi ho.

Vawiina NH 54 laih meka leivung paihna endikna hi June 28 a an bultan chhunzawm lehna niin Serchhip Dawngzawl ram atanga Bungtlang inkara hnathawktute hmalakna an en a. Vawiina an en hi Bhartia Infra Project Limited Company ten an hnathawh chin a ni.

Hmun hrang hranga an leivung paihna hmunte en sakin, an leivung paihin mipuite tana harsatna a siam sak nia an sawi hmunte, leivung paihna hmun khat liam nasa tawh lutuk dawlzawl belh dan turte, a hmun ruata leivung paih lova a remchang laia an paih tak mai na hmun nia sawite uluk taka enin, a hmun sawn ngai te sawn dan turte pawh an sawipui a ni. Monitoring Committee te hian Leivung paihna hmun tura thlanah chauh leivung hi paih ngei thin tura hrilhin, leivung paihna hmun khatliam tawh siamthat nana Retaining Wall siam tura tihte chu thla hnih chhunga lo thawk zo turin an hrilh a, hetih chhung hian lei laih hna lo thawk tawh rih lo turin an hrilh bawk. Contractor te erawh hi chuan ruahtui tlak tam laia Gabion Retaining Wall siam chu a harsa deuhva an rin thu an lo sawi ve thung a ni. Hna hi kan chawlhsan thiang bik si lova, tun hnuah chuan environment nasa lehzuala veng chungin hnathawh kan lo tum ang a, hmalakna tur min kawhhmuh apiangte tha taka lo bawhzui kan tum ang tiin Monitoring Team te hi an lo hrilh a ni.

Monitoring team te hi Pi Lalzikpuii, SDO, Sadaar hovin Member Secretary Pu Lalbiakchama Chawngthu, DFO, Thenzawl te, Mizoram Pollution Control Board aiawh te, Information & Public Relations Department aiawhte, Sub Headquarters YMA aiawh te, NHIDCL aiawhte leh Contractors hote an tel a ni.