No.3132/2021-2022
Aizawl, the 24th November 2021 : Land Revenue & Settlement Minister Pu Lalruatkima chuan vawiin khan Thara Resort Falkland ah, Johnson Diesel Sales & Service ten CASE company siam lei laihna khawl thar tlangzarhna leh an mahni dawrtute tana hengte an chhawpchhuahna programme an buatsaih chu a hmanpui.

Pu Lalruatkima chuan CASE company in lei laihna khawl thar an chhawpchhuah chu khawl hmanga eizawngtute tan hmasawnna rahbi thara chuankaina nia a ngaih thu sawiin Mizote hi khawl lama kan kutthemthiamna te hi a duai bik lova, a zia hi kan mang nghal vat thin a, talent nei tha tak kan ni a ti a. Tunhnaiah Mizo thalai tam takin sumdawnna lamah bultanin, bank loan te la in chungte nena tangin hma an la, vawiina kan mi hausa thar tam zawk hi chu thalai kum 50 hnuai lam te an ni hlom a, sumdawnna lamah kan thalai te hmalak leh taimak vang hian hemi kawngah hian potential an nei tha a ni tih hi a ti chiang hle in ka hria, a ti. He hunah khawl neia eizawng kalkhawm te – Mizoram Earth Movers & Back Hoe Loaders Association leh Mizoram Earth Movers Owners Association member te chu Mizoram tan hna chhenfakawm an thawk tih hriaa, an hnathawh kawnga an mahni ruaitute leh chawrtute thu leh hla ngaichang zela hna thawk turin a chah a ni.

JDSS hi Mizorama CASE Construction agent niin Mizorama lei laihna khawl tam tak hman mek hi CASE company kutchhuak a ni. Vawiin khawl thar an tlangzarh hi – back hoe loader (JCB kan ti mai), compactor leh excavator (Hitachi khawl kan ti mai) te a ni.