No.3133/2021-2022
Aizawl Sahmulphah thla ni 24, 2021: Mizoram Youth Commission (MYC)-in thalai, phai lama hna thawka awm, COVID-19 hri leng vanga Mizorama lo haw, hna thawh tur mamawhte'n eizawnna an neih theih nana thiam thil chi hrang hrang zirtirna (training) a ruahman zinga pakhat, MYC, SIRD&PR leh Core Team Committee on Skill Development Framework, Lawngtlai District te tang hovin an buatsaih Lawngtlai District tana ni 45 awh cement mistiri training neih zawh tak chu vawiin khan Lawngtlaia BDO BNRGSK Hall-ah a kharna hun hman a ni.

Training kharnaa Khuallian, Lawngtlai Bawrhsap Dr Andrew H. Vanlaldika chuan Mizoramah cement mistiri rawih tur mamawhna a sang tih sawiin, mistiri tha tan chuan thawh sen loh hna a awm tih a sawi a. Lawngtlai District-in cement mistiri zir chhuak mi 38 lai a neih belh chu lawmawm a tih thu sawiin, mistiri training chhuakte chu thiamna mai bakah, nungchang mawi, rinawmna, inngaihtlawmna, hun vawn dik leh hriselna te ngai pawimawh turin a chah a. Thiamna bik nei tura inzir taima tur leh mite'n an rawih duh zawng ni tura tan la zel turin a fuih bawk.

Training kharna hun hi Lawngtlai Additional Deputy Commissioner Pu James Miahlung chuan a kaihruai a. Trainer, Pu R. Malsawmdawngliana Khawlhring, JE (Design) & Programme Assistant, DRDA Lawngtlai chuan report a pe a. DRDA Project Director Pi Marilyn Rualzakhumthangi bakah, trainee-te hnen atangin thu sawi ngaihthlak a ni a. Training chhuakte hnenah certificate hlan nghal a ni bawk.

He cement mistiri training hi October ni 4, 2021 khan tan niin, training tura thlan mi 40 zinga mi 38 te'n training an zo thei a ni.