No.3134/2021-2022
Aizawl, the 24th November, 2021: Nimin chawhnu dar 2:00 khan Pu C.C. Lalchhuangkima, Deputy Commissioner, Khawzawl District kaihhruaiin DC Office Conference Hall-ah Pu PC Lalchunglura, Superintendent of Police, Khawzawl veng hrang hrang Village Council President, Sub-Headquarters YMA, Sub-Headquarters MHIP leh District MUP hruaitute an thukhawm a. Krismas leh Kumthar muanawm leh hlim taka hman a nih theih nan hemi hun tibuai theitu ruihhlo do dan tur leh dan leh thupek kenkawh dan tur an sawiho.

Meeting chuan Krismas leh Kumthar vuakvet, December ni 21, 2021 atanga January ni 3, 2022 thleng chu Khawzawl khaw chhunga vengtinah duty post siam nise tiin a rel a. Veng lun lai duty post pathumah police duty se tiin rel a ni bawk. Tin, Mualvawm Park leh Helipad a Concert, Singing competition, Dancing competition leh intihhlimna dang neih thin chu Covid-19 hrileng vangin kumin atan chuan phal a ni dawn lo a, chutihrualin tlai lam dar 4:30 thleng chu heng hmunahte hian len khawthawn phal a ni dawn a. Mitinin thlamuang taka hun nuam tak an hman theih nan Khawzawl khaw chhunga veng hrang hrang VDP leh YMA te chu Mualvawm Park-a duty inseam turin ngen nise tih a ni bawk.

Nimina hunpui vuakvet chungchang ngaihtuaha thukhawmte chuan ruihhlo chi hrang hrang heng Zu, Damdawi, Gutkha leh Gutkha products te chu khauh leh nasa zawka do nise, hemi atan hian sawrkar lam thuneitute leh NGO ten tangrualin hma lak nise tiin a rel a. A bikin taksa hriselna atana tha lo tak gutkha product hrang hrangte chu MHIP leh Police tangrualin Krismas hma ngeiin dapchhuah hna runpui neih nise ti a rel a ni bawk. Ruihhlo do na tur atana hmalakna hrang hrangte hi mipuiin zau zawka an lo hriat theih nan, tlangau leh information mike hmanga anmahni veng theuha puangzar turin VC te chu ngen leh sawm nghal an ni bawk. Heng bakah hian Krismas leh Kumthar vuakveta Medical Duty chungchangte, VDP din chungchang leh Magistrate duty chungchangte sawiho a ni bawk a ni.

Meeting-ah hian DC Office atangin Pu Lalrohlua, Additional DC leh Pu James Lalnithanga, SDO (Sadar) te an tel bawk a ni.