No.7131/2020-2021

Vawiin khan Information Minister Pu Lalruatkima, Aizawl West II bialtu MLA chuan Dinthar Branch YMA Committee Room thar a hawng. He hunah hian Rubber & Allied Crops Development Board Vice Chairman Pu Lalrinsanga Ralte, MLA chuan Minister hi a tawiawm a ni.

Pu Lalruatkima chuan Dinthar veng YMA chauh ni lo khawtlangin an chhawr tangkai theih tur YMA Committee Room thar tha tak hawn a ni ta chu lawmawm a tih thu sawiin Dinthar veng mipuite hnenah duhsakna a hlan a. YMA hlutzia sawiin Mizo pi puten nunphung inzirtirna tura an hman Zawlbuk thlak tu, mi rethei atanga hausa ber thlenga hrut ruala rawngbawlsaktu, kohhran leh political party hrang hrang sawi lova lungrual taka luan khawmna a ni, a ti a. Mizo nunah YMA  a pawimawh tulh tulh a, kan ram tana pawl hlu, COVID-19 dona kawngah pawh ram leh mipuite tana pawl tangkai an ni, a ti. Heti taka pawl pawimawh an nih avang hian thuneitu emaw dan chunga leng emaw an ni lo tih inhre turin Minister chuan a fuih a. Zawldawh tak leh tlawmngai takin, Kristian nun dan tha ngaisanga, tanpui ngai te tanpuitu an ni, a ti.

MLA Pu Lalrinsanga Ralte pawhin thu sawiin Mizoramah chuan YMA tel lovin eng khua leh veng mah a awm tak tak theih lo, a ti a. Tanpui ngai te tanpuia, mi harsate dawm kang tu, Mizo tlawmngaihna vawng nung zeltu an ni, a ti. Dinthar veng mi leh sa a nih angin Pu Lalrinsanga Ralte chuan veng leh khawtlang hmasawnna tura sawrkar hmalakna lawmawm a tih thu sawiin YMA Committee Room thar hawn tak chu tangkai taka hmang turin duhsakna a hlan a ni.

Dinthar Branch YMA Committee Room thar hi September ni 8, 2020 atanga sak tan niin a sak nan hian cheng nuai 9.6 vel hman a ni a. Bialtu MLA Pu Lalruatkima’n MLA LADS fund atangin cheng 5,46,500 a pe a ni.

Vawiin programme hi an branch YMA President Pu K.Laldawngliana’n a kaihruai a, Secretary Pu Johny Lalrinchhana’n technical report a pe a, Local Council Chairman Pu R.Lalawmpuia’n thu a sawi bawk. Veng chhunga tlawmngai pawl hrang hrang aiawh te leh Local Council member te an tel a ni.