No.3171/2021-2022

Aizawl, the 26th November, 2021: Vawiin khan Pu Lalruatkima, Minister of State, Land Revenue & Settlement, I&PR, etc., chuan Serchhip DC Conference Hall ah Computerization of Registration, National Generic Documentation System a hawng.

A hawnna inkhawmah Pu Lalruatkima chuan, Computerization of Registration hi kum 2019 khan Aizawl district ah hawn a lo ni tawh a, vawiinah Mizorama a pahnih nan Serchhip ah kan lo hawng leh thei ta hi a lawmawm hle a. Serchhip District mipuite in vannei hle a ni, a ti a. In hmun leh ram sawrkara chhinchiah leh chutiang lam kaihhnawih thil tinrengte awlsam zawkin mipuiten kan tithei tawh dawn a, kan hmunhma lehkha pawimawhte Computer hmanga vawn vek an ni tawh dawn a, in hmun lei leh hralh thuah te, document bo thuah te thlengin he hmalakna hian nasa takin min tiphuisui dawn a ni, a ti. Hmun lo ram teh leh lehkha pawimawh thuah Department in dem a hlawh chang a awm thin tih sawiin Minister chuan, heng mi thenkhat ten min han dem deuhna te pawh hi han chhui chian chuan a neitute fimkhur tawk loh vang leh chet fel tawk loh vang a lo ni fo zawk a. Chuvang chuan mitinin kan in hmun leh ram Pass thilte uluk taka vawng thaa, ramri chhinchhiahna te pawh fel taka siam thin a tul hle a ni, a ti a. Fel tak leh tha taka kan hmunhmate kan enkawl hian buai theihna tam tak kan pumpelh bakah thawktute pawh nasa takin min pui tihna a ni, a ti. Hripui vangin duh ang thalin SEDP kan kalpui thei lova; nimahsela kum thar atang chuan nasa zawka hmalak tumin sawrkar a inpuahchah tih sawiin, kuthnathawktute tan hmalakna tha tak tak hmuh tur a awm zel dawn a ni, a ti a. Khawvel changkang chho mil zelin hmasawnna hna pawh sawrkawrin a thawk ve zel tih tarlangin, hmasawnna hnathawh kawng tinrengah sawrkar thawhpuitu ni zel turin mipuite a sawm a ni.

Serchhip Bawrhsap Pu Kumar Abhishek pawhin thusawiin, Computerization of Registration hman theihna district pahnihna ni tura vawiina Minister-in a hawng ta chu lawmawm a tih thu a sawi a. India ram hmun danga hmunhma Pass an enkawl dan leh chhinchhiah dan enin Mizoram pawhin he hmalakna hi a mamawh hle tawh niin a lang a. He hmalakna hian mipuite leh Revenue a thawktute tan awlsamna nasa tak min thlen dawn bakah ramri thua buaina leh lehkha pawimawh bo thua buaina te thlengin a titlem thei dawn a ni, a ti.

A hawnna inkhawm hi Pi Angela Zothanpuii, MCS, Director, Land Revenue & Settlement in a kaihruaia,  Pu B. Hmangaihkima, Asst. IGR chuan technical report pein Computerization of Land Registration chu sawrkar laipui hmalakna a nih thu leh a Software te pawh One Nation One Software tura duan a ni a, India ramah he software hmang thei hmasa parukna kan ni a, NE states zingah pahnihna kan ni bawk a, he hmalakna hian ram chhinchhiah fel mai bakah Registration Fee leh Stamp duty thlengin kan tangkai pui hle dawn a ni, a ti.  Serchhip Sub-Registrar a thawktu turte chu an mamawh hmanruate chhawp an nih tawh bakah training te pawh pek vek an ni tawh thu a tarlang a.  Tin, Common Service Centre kaltlanga dawr theih an nih thu a tarlang bawk. Online Document Registration ti duhte tana online Address chu https://igrmizoram.nic.in a ni.

Computerization of Land Registration hawnnaah hian Land Revenue & Settlement officer pawimawhte, Serchhip a Common Service Centre neitute, chanchinbumite leh Serchhip a sawm bik official pawimawhte an tel a ni.