No.3172/2021-2022

Aizawl, November ni 26 : Vawiin chawhma dar 11:30Am khan Siaha bialtu leh Minister nibawk Dr. K. Beichhua, a bial fanga cham mek chuan Siaha khawpuia sorkar hmalakna hrang hrang te tlawh kualin a enfiah. Dr K. Beichhua chuan Siaha DC Office building sak mek a tlawh a, PWD Engineer leh contractor ten lo dawngsawngin, an hnathawh hmasawn dan te an lo hrilhfiah a, nakum 2022 ah sak zawh hman an beisei thu Minister an hrilh a ni.

Siaha DC Office sak mek a tlawh hnuah Siaha Vaihpi Community Hall sak mek tlawh leh in, contractor ten an hnathawh tawh chin leh an hmasawnna te lo hrilhfiahin, Minister chuan an hnathawh tawh chin chu tha a tih thu a sawi bawk. Siaha vaihpi Community Hall sakna atan hian Ministry of Tribal Affairs atangin Cheng Rs.500/- lakhs hmuh a ni a, kumin May thla-ah hna hi thawh tan a ni.

Dr. K. Beichhua chuan Siaha khawpui chhunga Mara Weaving & Handloom Centre sakna tur hmun tlawh nghalin, he centre sakna atan hian Northeastern Council atangin Rs. 500/- lakhs ruahman a ni.

Social Welfare Minister Dr. K. Beichhua chuan ECM KTP Headquarters in Tisopi kawnga Siaha Youth Centre (SYC) an sak mek a tlawh bawk a, Prayer Hall pakhat sak nan Rs.3/- lakhs tanpuina a hlan nghal bawk a ni.

Dr K. Beichhua hi  Pu Kesavan R, IAS, DC, Siaha; Pu Abraham Beirazi Khithie, Addl. DC,  Er. Kaphmingliana, EE, PWD te bakah party miten an tawiawm a ni.