No.3177/2021-2022

Aizawl, 26th November, 2021 : Tuikual South YMA te chuan zanin hian an veng chhunga  zirlai tițhate chawimawina hun, Tuikual South YMA Hall-ah an hmang a.  Pu Lalruatkima, Minister of State for Rural Development etc. leh bialtu MLA ni bawk chuan a hmanpui a ni.

Zirlai te hi an vaiin 161 - HSLC 79,  HSSLC 55,  Bachelors Degree 19  leh Post-Graduate Degree 8 an ni a. An zingah hian HSSLC (Arts)a Pakhatna leh Pahnihna HSSLC (Science) a Pahnihna te an tel a ni.

 Pu Lalruatkima chuan covid hripui vanga hun khirh tak hnuaiah zirna lama ramin hma a sawn theih na tura sawrkar hmalakna piah lamah YMA ten kumpuan thupui atan 'Zirna Uar'  an hmang chu lawmawm a tih thu a sawi a. HSLC leh HSSLC board examah Tuikual South in kum eng emaw chen atanga hmasawnna a nei chho chu lawmawm a tiin zirlai hlawhtling te leh an nu leh pa te, Tuikual South YMA leh veng chhung mipuite  a lawmpui thu a sawi a.  Zirna kawnga hmasawnna tura a ngaih pawimawh deuh deuhte tarlangin Pu Ruatkima chuan HSLC emaw HSSLC pass chhuak hlim ten zirna sang zawk atana an kalna tur kawng thlan fimkhur a pawimawh zia te, tum bik fel tak neia zirna kawng zawh a pawimawh thu te,  mi hman tlak ni tura taimakna leh tumruhna nen zir a țul thu te, nu leh pa leh zirlai te pawhin zirna chu investment pawimawh a ni tih an hriat chian a țul thu te a sawi a. Mizote zingah All India leh central service a tling an awm ngai ta meuh lo chu a vei thu sawiin Pu Ruatkima chuan state dangah pawh  thuneihna chelh thei tura All India leh central service lamah te luh tum turin zirlai te chu a fuih a. Central sawrkarah kumtin hnaruak tam tak a awm laiin Mizote zingah diltu an awm ngai mang lo chu pawi a tih thu pawh sawiin Minister chuan mahni khawtual ah chauh ni lo, India ram hmun zau zawkah sawrkar leh corporate lam thlenga inzar zau tum turin zirlaite chu tum nei rana zirna kawng zawh turin a chah a, an hmalam hun atan duhsakna a hlan a ni.

Zirlai te chawimawina hun hi Pu Lalchhanliana Chairman, Kumpuan Sub-Committee & President Tuikual South YMA in a kaihruai a. HSLC, HSSLC leh Bachelors Degree a rank holder te bakah District Teachers Award dawngtu Pu Michael Lalramliana te hnenah Special Prize hlan a ni.

Zanina Zirlaite chawimawina ah hian Pu A.C.Zonunmawia Vice Chairman Kumpuan Sub- Committee pawhin fuihna thu a sawi a. Resource person Dr.Robert Lalremthanga Ralte, Asst.Professor, Hrangbana College in zirtirna pein Pu R.Ngurkunga Treasurer, Kumpuan Sub-Committee chuan lawmthu sawiin hun hnung a khar a ni.

Attachment

  • Loading attachment...