No.2253/2021-2022

Aizawl, 17th September, 2021 : Tukin zing khan Vaivakawn chuan an veng kum 120 tlin lawmna leh Branch YMA Golden Jubilee lungphum hawnna hun Vaivakawn Bazar hmunah an nei a. IPR Minister leh bialtu MLA ni bawk Pu Lalruatkima chu khuallian a ni.

Pu Ruatkima chuan Aizawl khawpui veng hlun leh tlak lam tana bazar hmun pawimawh Vaivakawn in kum 120 hmel a lo hmu ta chu a lawmpui thu a sawi a. Bazar hmun laili leh airport panna kawngpui tan tlang a nih avangin Vaivakawn chu sawrkarin a ngai pawimawh a, Smart City project hnuaia Bazar building sak ?hatna tur te, kawngpui zauhna tur leh veng hmasawnna tur ruahmanna hrang hrang te siam a ni, a ti a. Hripui vanga duh anga chaka ruahmanna te bawhzui theih a ni lo chu pawi a tih thu a sawi a. Vaivakawn atanga indang VC 6 lai an awm tawh tih sawiin Pu Ruatkima chuan Vaivakawn khawtlang hruaitute leh mipuite pawh nu leh pa chan chang thiam ?hin hlea a hriat thu a sawi a. Aizawl tlak lam vengte tan bazar hmun pawimawh a nih angin hripui laka fimkhurna dan kenkawh leh zawm chungchangah te, faina leh thianghlimna kawngah te pawh nasa taka tan la chhunzawm zel turin a ngen a ni.

Vaivakawn kum 120 tlin lawmna inkhawm hi Pu Lalhmingsanga Project Sub-Committee Chairman-in a kaihruai a. AMC Counsillor Pu C.Lalfakzuala leh CYMA President Pu Vanlalruata te bakah CEC member te leh Joint YMA hruaitu ten an hmanpui a. Minister in Vaivakawn kum 120 tlinna lungphun a hawn hnu ah Branch YMA Golden Jubilee hriatrengna lungphun chu CYMA President Pu Vanlalruata'n a hawng ve leh a. Pu Vanlalruata pawhin thu sawiin Mizoram chhung leh ram pawnah YMA branch 816, Sub-headquarters 8 leh Group 50 ah YMA member 4,46,623 an awm mek tih a tarlang a. Hemi zinga branch nung leh chet chhuahna ngah tak, Vaivakawn in an din champha Golden Jubilee ah YMA din chhan ang takin midangte tana inpekna programme te buatsaiha hun an hmang chu lawmawm a tih thu a sawi.

Vaivakawn Branch YMA hi kum 1971 ah Dawrpui Vengthar atangin a indang a. A din tirhah member 113 niin tunah chuan member 2445 an awm mek a. Damlo te tan a thlawna inentirna Free clinic te, damlote tan thisen pek runpui te buatsaihin branch YMA Golden jubilee lawmna hi kumin March ni 16 atang khan an lo kalpui tan tawh a ni.