No.2254/2021-2022

Aizawl, 17th September, 2021 : Nimin khan Pu C.C. Lalchhuangkima, Deputy Commissioner, Khawzawl District Khawzawl Darngawn rama bawlhhlawh sakhat sawngbawlna tur, Solid Waste Management Centre sak mek chu a hmunah kalin a tlawh a, hna an kalpui mek dan enpuiin harsatna an neihte a sawipui.

Khawzawl District Bawrhsap chuan khawpui a than ang zelin kan khawsaknain a kentel bawlhhlawh pawh a pung a, heng bawlhhlawhte hi mumal tak leh awmze nei a sawngbawl a pawimawh tawlh tawlh dawn a ni, a ti a. Solid Waste Management chu India sawrkar laipui pawhin a ngaipawimawh hle tih sawiin, hna thawh kal lai mek chu a lungawithlak tih a tarlang bawk a ni.

Khawzawl Darngawn-a Solid Waste Management Centre sak mek hi UD&PA Department hnuaiah contractor in thawkin, a hmun hi Darngawn Village Council in UD&PA Department hnena an pek a ni a. Tun dinhmunah kawngpui atanga a hmun panna approach road chu RCC in metre 400 a thui, metre 3.5 a zau siam zawh tawh a ni a. A hmun tur hi metre 36 a zau, metre 48 a thui (1728 square metre) a laih zawl tawh a ni bawk. Hei bakah hian hman a nih tak tak huna a enkawltute chenna tur panna tur link road metre 150 laih zawh tawh a ni a, tun thlenga sum sen zat chu cheng nuai 48 a ni.

Hnathawh hmabak langsar zual zingah barbed wire hmanga a hungna (fencing) siamte, a luh tanna-a Gate siamte, site office leh tanky sak bakah bawlhhlawh tawih thei leh tawih thei lo thliar hranna khawl bunna tur hmun buatsaih te a tel a ni.

Solid Waste Management Centre sak hna thawktuten a nih tur ang taka sa puitling tur chuan sum awm sa in a daih dawn lo tih an hrilh chu Bawrhsap chuan chhangin, District Level Committee te nen ngaihtuah ho a hmalak a nih tur thu leh, a tul ang zela thuneitu sang zawkte hnen thlen a nih tur thu a hrilh a ni.

Khawzawl DC hi Pu Lalrohlua, Additional Deputy Commissioner, Pu James Lalnithanga, SDO(Sadar), Pu Ngurthansanga, DUDO, Pu H.Lalramenga, SDC leh Pu Lalruatsanga, JE (UD&PA) ten an tawiawm a ni.