No.2255/2021-2022

Aizawl, 17th September, 2021 : Vawiin khan AH&Vety Minister Dr K.Beichhua chuan Mualpui Salem leh Bawngkawn Brigade-a Slaughter House a tlawh. Pu H.Biakzaua, Vice Chairman, Agriculture Development Board chuan Minister hi a tawiawm a ni.

Dr K Beichhua chuan Slaughter House sakna tur Aizawl leh District dang 4 tan project siam a nih thu leh COVID-19 hrileng avanga umzui kawngah harsatna an tawh dan leh New Delhi lamah hri a ziaawm hnuin project umzui mek a nih thu a sawi a. Sa (meat)-ah Mizoram a intodelh theih nan hma lain, a bik takin vawksaah beiseina sang tak nen intodelh thuai tura hmalakna chak taka kalpui a ni a. Vanduaithlak taka vawk hri hlauhawm ber mai African Swine Fever in Mizoram a luhchilh tak avangin vawk tam tak an thi a, tam tak suat an ni ta bawk chu a lungchhiatthlak hle a ni, Minister chuan a ti. ASF avang hian vawk 27704 an thi tawh a, 13000 chuang suat an ni tawh bawk a. Heng vawk suat tak vulhtute tana zangnadawmna sumfai sawrkar laipuiah dil mek a ni, tih Minister chuan a sawi a. ASF avanga vawk thi te pawh a vulhtuten dzangnadawmna an hmuh ve theihna turin thuneitute hnenah dan anga ‘calamity’ a puang tura an ngen thu a sawi bawk.

AH&Vety Minister chuan tun dinhmunah ASF avangin ram dang atanga vawk lakluh a rem rih lo a. Mithiamten vawk vulh a him tawk nia an hriat hunah vulh tan leh a rem chauh dawn a. AH&Vety Department chuan ram dang Vawk Farm thianghlim atanga lakluh dan leh a tul anga quarantine hnua mipui mimir vulh theih tura semchhuah dan tur ruahmanna te pawh ngaihvenin, a zirchiang chho zel a ni, a ti a. Dr K.Beichhua chuan mipuite chu sawrkar thu ngaichang a, kan that tlanna tura sawrkarin tih tur leh tih loh tur a bithliah te zawm turin a ngen a ni.

Rural Slaughter House Mualpui hi May 2017 atang khan mipuiin an hmang tangkai tan a. Nitin vawk 50 leh bawng 50 talh theihna a ni. Slaughter House ah hian ran talh turte hi an hriselna endik hnuah talh thin niin mihring ei atana hrisel tawk lo leh ei atana him lo te chu hralh chhuah phalsak loh an ni a, sa hrisel chauh hnenah meat inspection certificate pek chhuah thin an ni. Slaughter House te hi Food Safety and Standard Authority (FSSAI) license pek tawh an ni a. Pollution Control Board atangin hman phalna pek an ni bawk.

Vawiin khan Mualpui Slaughter House tuichhe paihna - drainage system leh a kalpawhna kawng a hmunah endik a ni a. Tuichhe luankawr mumal tak a awm loh avangin a bik takin fur ruahtui tam laiin vantlang leh mimal ram a hrut nasa thin a. Approach road a hlui tawh avangin chei that a ngai bawk a. Heng harsatna sukiang tur hian ruahmanna siam niin sum mamawh tur zat estimate siam a ni tawh bawk. Brigade Slaughter House pawh a panna kawng chei thatna tur ruahmanna siam a ni bawk a. Sum estimate pawh duan a ni tawh a ni.