No.2256/2021-2022

Aizawl, 17th September, 2021 : Chief Minister Pu Zoramthanga chuan tukin khan Chanmari - Chaltlang inkar pavement siam leh kawng zauhna, Rs.300.30 lakh senga Aizawl Municipal Corporation (AMC) hmalakna chu a hawng.

Chief Minister chuan kawng tha tak, a zawhtu lirthei tan leh ke a kalte tan pawh a nuam taka siam AMC hmalakna chu fakawm a ti a. Kawngsiam chungchangah thiamna a sang zela, hmana huphurhawm thin kha harsa lutuk lo a tih dan thiamna chharchhuah belh a nih zel thu sawiin, kawng zauh leh siamthat hna tha zawk pawh thawh belh theih zel a beisei thu a sawi. Chief Minister chuan ngaihtuahna seng a, a theihlohna aia a theihna te kan thlir thiam a, tumruhna nen a hmalak chuan Mizoram hi thlak danglamin, economy entawntlakah kan siam theih thu a sawi a. Malsawmna hrang hrang kan dawn te hi tangkai taka hman dan ngaihtuah chhuak a, midang tih turah ngawt dah lova, mahni ngeiin kan ram hausakna hi haichhuak a, tangkaipui a, hausakpui chu kan tih tur a nih thu a sawi.

AMC Mayor Pu Lalrinenga Sailo pawh he hunah hian thu sawiin, harsatna hrang hrang kara tha taka hna thawk a hawn theih a peih a ni chu lawmawm a ti a. Tangkai taka hman chhoh zel anih a beisei thu a sawi. Mayor hian AMC hmalakna thar awm zel tur sawi telin, "Site Development and Slope Modification Regulation" chu hun reiloteah hman a nih tur thu a sawi a. Hemi hnuaiah hian insakna tur leh Land Development atana lei laih ngai reng reng chu phalna lak hmasak phawt zel a ngai tawh dawn a ni. Hemi bakah hian khawpui chhung faina leh thianghlimna tihhmasawnna tura ruahman mek zingah vawk leh ar vulh khap a tel thu sawiin, Aizawl khawpui chhunga chengte chu lo in hmakhua lawk turin a ngen a ni.

Vawiin programme hi AMC Commissioner Pu K. Laldingliana chuan kaihruaiin, Pu Zohmingthanga, EE, Technical Engineer hnen atangin report ngaihthlak a ni a. Deputy Mayor R. Thanglura chuan lawmthu sawiin hun a khar a ni. Adviser to CM (Technical) Er. K. Sawmvela, AMC Councillors te leh sawrkar hotu thenkhatte vawiin hian an tel a ni.

January ni 25, 2019 khan footpath siamna tur project, AMRUT incentive atanga cheng nuai 100 hmuh hmanga Chanmari leh Chaltlang inkarah 253 metre (830 feet) chu thawh tan a ni a. Contractor atan Pu T. Thanzauva, Electric Veng, Aizawl chu open tender a thlan a ni. Kawng zauh tel nise tiin, ruahmanna awmsa chu ennawn a siamthat a nih leh hnuah AMC sum cheng nuai 200.30 sen belhin, footpath mai bakah kawng zauhna hna chu telhin, a project hming pawh "Construction of Footpath and Extension of Road from Chaltlang to Chanmari" tih a ni ta a. Footpath hi chawhrualin 1.85 m (6 feet) a zau a ni a, kawng zau zawng hi chawhrualin 8 m (a hma in 5.5 m) a ni. March ni 15, 2021 khan thawh zawh a ni a. He project hrulah hian Shalom Church, Chaltlang a retaining wall siam (AMC sum 27.20 lakhs) leh metre 170 a thui Chanmari-Chaltlang footpath (AMRUT sum Rs. 73.14 lakhs) chu thawh a ni bawk.