No.2257/2021-2022

Aizawl 17th September, 2021 : Vawiin khan Mamit District tana Swasth Digital Health Foundation leh World Vision India te'na Mamit District-in Covid-19 a dona tura hmanraw chi hrang hrang an pek chu Bialtu MLA leh Vice Chairman, SEDP Bamboo Development Board te chuan CMO leh DMS, Mamit District te kutah an hlan.

Er. H. Lalzirliana, Bialtu MLA chuan Covid do hna chu Health Department a hnathawkte tihturah chauh dah lovin mimaltin kan tanrual a pawimawh thu a sawi a. Covid hian engchen nge min chenchilh dawn a hriat loh avangin chenpui thiam a, post Covid life nundan thar kan inzir chhoh a ngai dawn a ni a ti. Covid a reh hunah pawh kan nundan phung abik takin chhiatni/thatni-a kan punkhawm thin danah te kan that tlanna tura kan insiamrem thiam zel a pawimawh dawn a, tun dinhmun hun khirhkhan kan tawn mek hian keimahni insiamthatna leh kan khawtlang bakah kan ei leh bar intodelhna kawngah nasa takin a tha zawnga nghawng a neih thu sawiin chhungkaw pa berin inchhungkhur a awp tam phah a, fate enkawlna kawngah nasa takin an nupuite an pui a. Kuthnathawktute thinlungah pawh intodelh tumna leh tumruhna nasa zawk kan neih phah bawk a ni a ti. Sorkar pawhin kuthnathawktute ngaihtuahin an huanram thlenga lirthei-a an luh theih nan nasa takin hma a lak mek zel thu a sawi bawk.

He hunah hian Dr. K. Pachhunga, Vice Chairman, SEDP Bamboo Development Board chuan Covid-19 hrileng chuan nasa takin kan ram min chenchilh mek a. He hri hian tumah a thliar loh avangin kai thei vek kan ni a, chutihrual erawh chuan apawng taka hlauh lutuk emaw, hlauh loh lutuk avanga midang dinhmun hlauhawma dah chu thil tha a ni lo a ni a ti. Mamit District tana Covid kaihhnawiha hman tur hmanruate chu anihna ang taka hmang turin duhsakna a hlan bawk. Dr. C. Zothankhuma, CMO Mamit leh Dr. T. Lalrintluanga, DMS Mamit pawhin ACT Grants & Swasth Digital Health Foundation leh World Vision India te hnen atanga Mamit District chhunga hman tur Covid dona tur Medical Equipments thahnem tak an dawng chu lawmthu an sawi a. Heng hmanrua dawn theihna tura theihtawpa hmalakpuitu District Bawrhsap chungah lawmthu an sawi bawk a ni.

ACT Grants & Swasth Digital Health Foundation atangin Oxygen Concentrators sawmhnih (20) dawn a ni a. Oxygen Concentrator pakhat hi Rs.71,563/- man zel niin, avaiin Rs. 1,502,832/- man a ni. Word Vision India hnen atangin N95 Face Mask - 1500 pcs, Face Mask 3 ply- 2500 pcs, Faceshield - 250 pcs, Surgical Gloves -1000 pcs, Pulse Oximeter -250 pcs leh PPE Kits- 500 pcs te an ni a. Heng bungruate hi avaiin Rs 1,037,500/- man vel a ni. Heng hmanruate hi District Hospital CMO leh DMS te'n a tul dan angin District chhung hmun hrang hrangah an sem darh leh dawn a ni.

Hei bakah hian Powergrid Corporation hnen atangin kumtir lam khan Covid dona hmanrua thahnem tak dawn a lo ni tawh a. Central Warehousing Corporation (CWC), Guwahati, Assam hnen atangin CSR Fund hnuaia buatsaih tur District Hospital Complex, Mamit-a Covid dona Makeshift Hospital sakna tur leh hemi hmuna Medical hmanraw dah tur Proposal cheng nuai 20 man hu chu thehluh tawh niin pawm a ni tawh a, Fund sanction hun chiah nghah a ni tawh a ni.

He hun hi Dr. Lalrozama, IAS, District Bawrhsap-in kaihruaiin Sorkar Department hotute, khawtlang hruaitu leh tlawmngai pawl aiawhte bakah thutharthehdarhtute an tel a ni.