No.2258/2021-2022

Aizawl 17th September, 2021 : India ramin zalenna a hmuh champha phak vawi 75-na lawmna, ‘Azadi Ka Amrit Mahotsav’ kalpui mekah Lawngtlai District Water & Sanitation Mission (DWSM) buatsaihin vawiin atang khan Lawngtlai District-ah faina beihpui thlak kalpui tan a ni a. He beihpui thlak hi faina hnatlangpui 'swachhata shramdaan' hmangin hawn a ni.

Swachhata shramdaan hawnna hun hi tukin khan Lawngtlai Bazar Venga Areopagy hmunah DWSM Chairman, Lawngtlai Bawrhsap Dr Andrew H. Vanlaldika hovin hman a ni a. He hun hi Public Health Engineering Department (PHED), Lawngtlai WATSAN Division-a Sub-Divisional Officer Er L. Sangromuana'n a kaihruai a. Lawngtlai SDO (Sadar) Pi TT Beikhaizi chuan inlawmna thu sawiin, District Hospital Lawngtlaia District Medical Superintendent Dr Zothanpari Chhakchhuak, Honorary Wildlife Warden Pu Ch. Vanlalruata leh Central Young Lai Association-a Assistant General Secretary Pu Joseph Lalhmingthanga Chinzah te'n faina inzirtirna thuchah an sawi a. Lai Autonomous District Council-a Senior Sanitation Officer Pu Andrew C. Lalhmunsiama'n lawm thu a sawi hnuah faina beihpui kawng zawh buatsaih chhunzawm a ni a. DWSM Chairman, Bawrhsap Dr Andrew H. Vanlaldika chuan faina beihpui thlak hi hawngin, kawng zawh turte hi a vai liam a ni.

He beihpui thlak hawnnaah hian thu sawitute chuan faina pawimawhzia te, faina leh hriselna a inzawm tlat thu leh chu chu hausakna nen pawh a inzawm thu te, polythene lam chi hmang tlem tura inzirtirna thu te, bawlhhlawh tawih thei leh tawih thei lo thliar hran pawimawhna te, bawhhlawh paih fimkhur a tul thu te, tuiluankawr tha leh felfai tak neih leh enkawl that pawimawhna te leh faina kawnga tan la tura fuihna thu chi hrang hrang an sawi a ni.

Azadi Ka Amrit Mahotsav lawmna peng pakhat atan faina beihpui thlak kalpui turah hian District Water & Sanitation Mission ruahmannain September ni 20, 2021-ah District chhunga khaw tinah plastic hman nawn theih loh chi (single use plastic) hman loh hram tum tur leh ODF Plus ni tura intiamna hun hman tum a ni a. October ni 2, 2021-ah Swachh Bharat Diwas chu District leh Block hmunpui bakah, Cheural, Lunghauka leh Hmunlaiah te hman a ni bawk ang. Hei bakah hian, ODF Plus ni tura hma lakna kawngah wall painting leh slogan writing competition te buatsaih tum a ni bawk.