No.2259/2021-2022

Aizawl, 17th September, 2021 : JICA tanpuina a sak tur cheng vaibelchhe 500 man Mizoram State Super-Speciality Cancer and Research Centre chu vawiin khan internet kaltlanga hawn a ni a. Mizoram Sawrkar aiawhin Health Minister Dr. R. Lalthangliana, Health Secretary Pu R. Lalramnghaka, Health Director (DHME) Dr. T. Lalhmangaihi leh Dr. Jeremy L. Pautu, Project Coordinator, Mizoram State Super-Speciality Cancer and Research Centre te an tel a, JICA aiawhin Mr. Takeuchi Takuro, Director, South Asia Division-I, Mr. Wakabatashi Kota, Country Officer, South Asia Division-I leh Mr. Kato Shinichiro, Country officer, South Asia Division-I bakah JICA Survey Team member te an tel a ni.

Health Minister Dr. R. Lalthangliana chuan JICA in Mizoram ngai pawimawha project hlu tak leh rotling turah hma an rawn la chu lawmthu a sawi a, Cancer in Mizoram a nghawng dante sawilangin kan theihtawp kan chhuah chung pawh hian harsatna kawng hrang hrangah kan nei a, hengah te pawh JICA in ruahmanna leh rawtna fel tak nena ngaihtuahna an senpui avangin lawmthu a sawi a, he project hlawhtlinna tur hian Mizoram sawrkar chuan theihtawp a chhuah dawn tih a sawi a, Mizoram mipuiten an nghakhlel hle tih sawiin, malsawmna hlu tak rawn thlentu an ni ngei dawn tih a sawi a ni.

JICA aiawhte pawhin Mizoramin hriselna kawnga hma a laknaah an tel ve thei chu lawmawm an tih thu an sawi a, Mizoram tan he project hi a pawimawh tih an hriat thu sawiin, theihtawp an chhuah dawn tih an sawi a, Mizoram rawn kal an phur thu leh Mizoram mipuite nen thawhhona tha tak an neih an beisei tih an sawi bawk a ni.

JICA lam hian an ngaih pawimawh hrang hrang sawiin zawhnate an inzawt tawn a, sawihona hun tha tak neih a ni a, Individual Cancer Control Policy ruahman tura thawrawn rawn pe in, a tul a nih chuan anmahni pawhin an pui thei tih an sawi a ni.

Mizoram State Super-Speciality Cancer and Research Centre sakna tur project proposal hi May ni 10, 2019 khan thehluh a ni a, Health Minister leh Health department hotuten vawi duai lo hmunpui lamah an bawhzui hnuin August ni 14, 2019 ah Department of Economic Affairs chuan an pawm a, November ni 11, 2019 khan Public Health Foundation of India (PHFI) leh Mizoram sawrkarin DPR siam tura MoU ziakin, May ni 7, 2020 khan Mizoram sawrkarah DPR kimchangin thehluh a ni a, Ministry of Health & Family Welfare, Govt. of India ah thehluh niin, Technical Appraisal Report buatsaih tura thurawn pek a nih angin Mizoram sawrkarin a buaipui chhunzawm nghal a, August ni 31, 2021 khan Health Minister Dr. R. Lalthangliana hian Union Health Minister kutah a hlan a ni.

JICA hotute hian kum 2023 ah hna thawh tan an inbeisei thu an sawi a, senso tur hi cheng vaibelchhe 500 niin, JICA loan cheng vaibelchhe 400 (80%) puk tur niin, Mizoram sawrkar tum ve tur hi cheng vaibelchhe 100 (20%) a ni a. Loan hi India President hminga puk a ni a, a hna thawktu tur hi Mizoram sawrkar a ni. Kum 5 chhunga thawh zawh tura ruahman niin, loan hi kum 30 chhunga rulh zawh tur a ni a, grace period kum 10 dang a la awm thei bawk a ni.

JICA hotute chuan project tihhlawhtlinna tura pawimawh leh tulte sawiin, a theih ang angin anmahni pawhin hma an lakpui zel dawn tih an sawi a, Mizoram sawrkarin hma a lo lak hmasak tur pawimawh chi hrang hrangte an sawi bawk a ni.