Vawiin khan Mizoram Mathematics Society (MMS) chuan I&PR Auditorium-ah National Mathematics Day an hmang a, Planning Minister Pu Lalsawta chu khuallian a ni.
Pu Lalsawta chuan khawvel huapa hriathlawh Mathematician ropui tak tak theh chhuaktu India ramah kan cheng a, chung mithiamte zingah chuan Mizote kan la tel ve lova, kawng thui tak zawh tur kan la nei a ni, a ti. Minister chuan Mathematics subject ah Zofaten hmabak kan la ngah em em a, kan thiam lova, kan ngaina lova, ngawihnawm pawh kan ti lo: chuvangin Mizo zirlaite’n Mathematics-a kan ngaihdan kan thlak hlawk a ngai a ni, a ti a. Thiam tur chuan taimak leh tumruh a ngai a, midang pawhin an thiam theih chuan kan thiam ve thei tih thinlung kan pu tur a ni, a ti. Zirlai, zirtirtu, education department, tlawmngai pawl, khawtlang leh nu leh pa te kan tanho a kan beih phawt chuan khawvelah Zofate aia tha an awm chuanglo, Pu Lalsawta chuan a ti bawk.
Directorate of Science & Technology-a Chief Scientific Officer Dr RK Lallianthanga pawhin thu sawiin Planning Minister thahnemngaihna avanga science and technology Department in hma a sawn chak zia leh hma sawn zel tura hma an lak dante a tarlang a. MMS-te’n Mizo zirlaite zinga Mathematics subject hmasawnna tura hma an lak dante fakin zirlai kalkhawmte pawh an hmabak eng tak bawhpelh lova taimakna nen lehkha zir sauh sauh turin a fuih a ni.
7th State Level Mathematics Competition a lawmman latute hnenah lawmman sem nghal a ni a. He intihsiak hi Class V, Class VIII, Class X leh Class XII te tana buatsaih a ni. Kumin hian Aizawl, Lunglei, Serchhip, Champhai leh Kolasib Centre-ah te November ni 25 khan exam neih a ni a, zirlai naupang 1,942 zet in exam an bei a ni.
Class V-ah Zotluangpuii Renthlei d/o Laldingliana Renthlei, Baptist Higher Secondary School chuan lawmman pakhatna la in pawisa fai cheng 5000 leh thuziak a dawng a. Class VIII-ah Lalthlamuanpuii, d/o Lalrinmawia Hrahsel, Lalmalsawma Memorial School in lawmman pakhatna la in pawisa fai cheng 6000 leh thuziak a dawng a. Class X level a pakhatna chu Konthoujam Sinthoibi, St.Johns Hr.Sec.School niin cheng 7000 leh thuziak a dawng a. Class XII a pakhatna dawngtu Snehasudha Subhadarsini, St Pauls Hr.Sec.School chuan cheng 8000 leh thuziak a dawng a ni. Lawmman hi pakhatna atanga pathumna siam a nih bakah consolation prize mi pasarih zel hnenah pek an ni bawk.
Mizoram Mathematics Society (MMS) member zinga Mathematics-a PhD hmuthar mi panga hnenah lawmpuina thuziak an hlan bawk a. Chungte chu R.Lalawmpuii, Lalhmangaihzuala, Ramdinmawia, Denghmingliani Zadeng leh LP Lalduhawma te an ni a. Ramdinmawia hian Universite Lille I-Sciences Et Technologies, France atangin doctorate degree a hmu a. Midang palite hian Mizoram University atangin doctorate degree hi an hmu a ni.
National Mathematics Day lawmna inkhawm hi MMS President Pu L.Thangmawia’n a kaihruai a, an pawl Secretary Dr. LP Lalduhawma’n an pawl hmalakna hrang hrang tarlangin France atanga doctorate degree hmu thar Dr.Ramdinmawia’n keynote address a sawi a ni.
