Vawiin khan Aijal Club ah Law & Judicial Minister Pu Lalsawta hovin Child Welfare Committee leh State Protection Society, Social Welfare Department tangkawp buatsaih ‘Stakeholder’s Plenary Discussion on Protection on Children from Sexual Offences (POSCO), Act 2012’ neih a ni a. Aizawl leh District danga member te an kal tha hle.

Naupangte a bik takin hmeichhe naupangte hi an taksa leh an rilru khawih chhiat an nih thin avangin keini ramah pawh hetiang case hi a tam ta hle chu a lungngaih thlak a ni tiin khuallian Pu Lalsawta chuan hmeichhia leh naupang kumtling lo te khawih an nih in an sawichhuah hlauh vang emaw an ngaihtuahna piansual vang emaw in an nunna rawng taka laksak an tam ta chu pawi a tih thu a sawi a. Tupawh hi he sualna bawlhhlawh tak tuartu hi kan ni thei vek a, chuvang chuan sorkar, tlawmngai pawl, khawtlang, Police te hian hruikhat vuanin kan do tlan chu tih makmawh a ni tawh, vawiina sawihona atangte hian sorkar in a tih tur awm ang apiang ti thei turin theih ang chin chinah sorkar lam pawh inbuatsaih a ngaiin a tul hle a. Mipuite leh khawtlang thatna tura pawl hrang hrang pawhin theihtawp chhuaha tan khawh a ngai tawh ani a ti.

Hetiang thubuaiah hian a tuartu ber hi naupang chumchiap an nih miau avangin mahni inveng tura zirtir leh hrilhhriat an la harsa a, chuvangin nu leh pa te pawh hetiang case a pawikhawihtu tam zawk hi chhungkhat laina hnai an ni tih hria a fimkhur turin Minister chuan a chah bawk a, Hetiang thilah hian thuhretu te an pawimawh rualin Police te pawhin duhdah taka hma la lovin misual chu hrem a nih ngei theihna tura bawhzui that a ngai a. Misualte chu hrem lohin an awm tur a ni lo tiin ram tana tha tur sawichhuah ngei a nih theih nan kalkhawmte chu tan la turin a ngen nghal a ni.

Vawiin Programme Prof. Dr Lalkima, Chairperson Child Welfare Committee kaihhruaiah hian Pi Vanramchhuangi pawhin thu sawiin District tina CWC ten,naupang enkawl leh venhim ngaite tana hna an thawh kawngah harsatna inangtlang nei an ni a,chung te leh naupang pawngsual thubuai rei tak chinfel loh leh pawngsual tu bail a chhuah a ni leh mai thin chungchang te sawiho tur an nih thu a sawi. Pu VL Chama Hnamte,Chairman CWC,Champhai Dist te, Pu James Lalthangmawia DCPO Aizawl te,Pu Rex Zarzoliana Vanchhawng Addl.SP Aizawl (Crime ) te,Pi Marli Vankung, PresidingOffice(MACT)Judicial Dist.Aizawl leh mi dang te thusawi ngaihthlak aniin nilenga hun hman ani.

Protection of Children from Sexual Offences ( POCSO ) Act hi naupang kum 18 chin hnuai lam pawngsual leh khuaikhem chungchanga naupang venhimna dan khauh tak niin chutiang thubuai chu rang taka ngaihtuahna tur bik Special Court Aizawl leh Lunglei ah din a ni tawh a. Naupang pawngsual tawkte enkawl tur hian Child Welfare Committee leh District Child Protection Unit te he dan hian mawhphurhna sang tak a pe bawk.