Tukin zing khan Aizawl East II Bialtu MLA Pu Lalsawta, Finance Minister ni bawk hovin Chhinga Veng chhung Bethany leh helai chheh vel chuan hnuai thlengin tlawh kualna hun neih a ni a. MLA Fund Cheng nuaih sawmpakhat chuang senga motor kawng sial mek leh vengchhung intlawhpawhna Step siam lai mek leh chhe tawh repair ngai te leh tuihawkluankawr te ,Unit huam chhunga en tur pawimawh te thlir ho niin hmalak zui dan tur te sawiho nghal ani bawk. Local Council hruaitu aiawh leh khawtlang hruaitu te bakah Unit hruaitu aiawh ten Minister hi an tawiawm a ni.

Bial fan programme kal zelah bial chhung mite tawiawmna leh phurpuina ah lawmthu sawiin Bialtu MLA Pu Lalsawta chuan MLA Fund leh Sorkar hmalakna a Vengchhung mipui te hmasawnna tur leh vengchhung siamthat hnathawh naah tih tak takna a ngaih thu a sawi a. Tun hnai mai hisap tur a ni lova, nakin zelah hmingchhiat leh hmingthatnaah kawngro a su hle tih hriat a pawimawh a, kan hnathawh a tlo loh chuan a thawktu hmingchhiatna niin a thata a tlo phawt chuan mite hian an hre rei hle a ni tiin veng chhung tana Ro Tling ngei tur siam duhna rilru pu zel tur in Bialtu MLA chuan a fuih a ni.

Pu Lalsawta chuan Local Council Bye Election lo awm turah an bial chhung Chhinga Veng leh Chite-ah pawh inthlanna hi neih a nih dawn avangin a thlang tur venga awm te chu ram leh hnam tana mi chhenfakawm thlangchhuak thei ngei tura ngaihtuahna hmang tur leh inthlanna felfai leh thianghlim neih anih theih nana tan la turin bial mipui te chu a chah a. Inthlang ram kan nih ang ngei a a thlang thei tu tur in Electoral Roll ah an hming a chuang ngei em tih te pawh lo chian hmasak a pawimawh thu a sawi bawk.

Aizawl East II bialtu MLA Pu Lalsawta hian a bial chhunga Sorkar hmasawnna kal mek leh Vengchhung siamthatna leh bial mipuite tlawh kual hi naktuk-ah chhunzawm leh tur niin a tlawhkual tawpna tur a ni tawh ang.