Vawiin khan Education Minister Pu Lalsawta'n Govt. T. Romana College Freshers' Social cum Graduation Day a hman pui a. Chanmary YMA Hall-a he hun hmanna ah hian Chief Guest Pu Lalsawta hian College magazine release in zirlai hlawhtling te chawimawina leh lawmpuina thilpek a hlan nghal a ni.

Pu Sawta hian zirlai hlawhtlingte lawmpuina thu sawiin an zir leh zelna atan duhsakna a hlan a. Govt. T. Romana College hmasawnna atan zirtirtute leh zirlaite nen pawh a rilru put hmang a inang hle tih a sawi a, ama chanchin sawi langin zirna hian tlai luat a nei lo a ti. Tunlai thalaite hian zirna kawngah hmanlai mite hmuh phak loh vanneihna tamtak an nei a, Media leh IT a hmasawnna chi hrang hrangte hi zirlaiten hmang tangkai se a duh tih a sawi. Mizoram ah industry lian tham dina khawvel ram dangte el pha tur chuan raw material kan neih that loh avangin a harsa mai thei a, chutih rual erawh chuan zirna lamah chuan khawvela lang pha tur khawp-in Mizote hi kan tha tawk a ni a ti. Hmun danga zirna tha uma Mizoram pawna kal reng lovin, zirna tha hi Mizoram chhungah kan la lut tur a ni a, zirna tha awmna - hmun dang atang pawha an pan huai huai - ramah Mizoram siam turin zirna lamah hian rilru zau zawk kan put a tul a ni a ti.

Govt. T. Romana College ah hian zirlai 647 awmin Bachelor of Arts subject hrang hrang an nei kim tha hle a. MZU hnuaia result chhuak hnuhnung berah khan zirnaa hlawhtling graduate thar pawh 75 lai an awm a ni.