Vawiin khan Education Minister Pu Lalsawta’n cheng nuai 30.81 senga Rashtriya Madhyamik Shiksha Abhiyaan (RMSA) kaltlanga Strengthening of School Building ruahmanna hnuaia Govt. Tanhril High School building sak that thar chu a hawng.

School Building hawnna inkhawm sikul tuala buatsaih ah thu sawiin Education Minister Pu Lalsawta chuan Zirna hian mihring hi mipuitlingah a chhuah a, chuvangin lehkha thiam te chu khawtlang, ram leh kohhran te tan mi tangkai leh mi chhawrtlak an ni thin a ni, a ti a. India chu hnam hrang hrang chenna leh tawng hrang hrang hmanna ram anih thusawiin ram leh hnam pakhat anga kan awm theihna chhan chu sakhaw tih bik nei lo zirna ram pumah sawrkarin a kalpui avang a nia a hriat thu a sawi lang a ni.

Pu Lalsawta chuan tunlai khawvela thiamna leh changkanna te a than nasat thusawiin zirna pawh hi mamawhna anga her rem thiam a tul a, a chhawrtu leh a ruaitu tur ten skill an duh ang thiam a ngai a chuvangin zirna hi tin zawn neia kalpui chho zel a tul dawn a ni a ti bawk.

Zirlai naupang kalkhawmte chu an zirlai reng reng ngun taka zir thin turin a fuih a, nu leh pate pawh an fate ngaihsaka a tul zawng zawng te buaipui thin turin a chhah a ni. Govt. Tanhril High School Building sak thar ah hian zirlai naupang 35 len theihna classroom 2, Science laboratory, Computer room, Arts/crafts/culture room leh library te a awm a ni.

Vawiin sikul building hawnna programme hi Pu J. H Biakmawia, Joint Director, School Education Department chuan kaihruai a. Tanhril khawtlang mipui leh tlawmngai pawl hrang hrang aiawh te an tel tha hle a ni.