Serchhip High School in kum 50 tlin lawmna, Goleden Jubilee Celebration ni 2 chhung an hman chu vawiin a ni hnihna ah Chief Minister Pu Lal Thanhawla chuan a hmanpui.

Chief Minister chuan kum 50 hi mihringte tan kawng engkima puitlinna hun a ni a, Serchhip High School pawhin mi puitling chhuanawm tak tak thahnem tak alo chherchhuak tawh a, a lawmawm hle a ni, a ti a. A School dintute leh lo enkawltu zawng zawngte thahnemngaihna, tlawmngaihna leh taimaknaah lawmthu a sawi a ni.

Chief Minister chuan Mizo tawng hi zirlai subject pawimawh tak anih angin ahman danah kan uluk hle a ngai a ni tiin, literature a hausa tak kan nihnaah, a ti hausa leh zual tura kan uluk a tul a, zirtirtute phei chuan kan tawng hi a changtlun leh zual nan kan fimkhura, kan uluk bik angai hle a ni a ti.

Tunlai khawvel hi thalaite hun a ni tiin, Chief Minister chuan sorkar chuan zirna lam leh infiamna lamah hma ala nasa hle a, zirna lama kawng dik leh chhenfakawm an neihna turin Education Reforms Commission, India a pahnihna din a nih thu a sawi a. Hei hi Planning Commission te leh Human Resourse Development te pawhin tha an ti a, ataka hman anih theih nan tunah hian a senso tur Rs. 700 Crore chu a tahtawla min pek an tum mek a ni a ti a. Zirna tha leh sang zawk kan ram ngeiah kan neih theih nan tunah NIT leh IIMC ten bul an tan tawh a, Institute of Hotel Management pawh a in tur Bung Bangla-ah sak zawh tawh anih thu a sawi a. Hengte bakah Medical College leh Management lamte bakah NEILIT, Aizawla awm mek bakah leh Lunglei ah din mek a ni a ti. Hengte bakah hian thalai ten awlsam zawka sipaiah an luh theihna turin kan ram ngeiah sipai lak runpui buatsaih thin tura sipai hotute a ngen thin thu a sawi a. Tunah hian thalai 2500 chaung sipaiah kan thunlut tawh a ni a ti a. Sipai Officer ni thei tur leh khua leh tui tha chherchhuak turin Sainik School pawh Chhingchhip-ah bul tan mek anih thu a sawi bawk a. Infiamna lamah a hmunhmate siamin nasa takin kan thang chho mek zel a ni a ti.

Chief Minister chuan kan mamawh ber chu Lal Isua leh ngaihtuahna thar, moral reformation a ni, a ti a.Ringtu kohhran mi vek kan nih angin, ei leh bara intodelh tur te, hnam hrisel nih tuma min ti hrisello thei laka fihlim kan turn tur a ni a ti a. Corruption kan tih hian sorkar sum eiruk ringawt a kawk lova, thatchhiatnate, zelthelnate, kuttlinglova sum lak tumna te, tlemte thawha tam ber lak tumte hi a huam vek a ni a ti. Chuvangin ringtu kan nih angin kan inbihchian angai a, a chhelai siam tha tura koh vek kan ni, a ti.

Zoram leilung fa ten kan thawh theih reng, kan thawh peih loh, pawnlam mi te thawh tura kan dah hian, kan rama sum cham bang tur cheng vaibelchhe tel min lak sak a, hetiang renga kan kal chuan nakin lawkah pawnlam mite hnuaiah kan la kun mai ang tih a hlauhawm a ni tiin, Chief Minister chuan thalai ten heng hi hria a, thanharh a hunzia hre turin duhthawh takin a chah a ni.

Serchhip H/S kum 50 tlin lawmnaah hian NSS hmalaknain ‘free medical camp’ buatsaih te, nau hnuchham enkawlna man buhfai leh chawhmeh pek te, a thlawna thisen pek te leh school alumni din te in an lawm a ni. Serchhip H/S ah hian Higher Secondary School kum 1996 khan din a ni a.Tunah hian High School-ah Headmaster tiamin zirtirtu 15 leh zirlai 256 an awm mek a, Higher Secondary ah Pricipal nen zirtirtu 26 leh zirlai 300 chuang an awm bawk a, a school pumah non teaching staff 5 an awm bawk a ni. Secondary Schoolah hian Arts leh Science zima bakah vocational course awm bawkin, horticulture subject kalpui a ni.

Chief Minister hi a nupui Pi Lal Riliani bakah Pu K.Lianzuala, Chairman KVIB ten an tawiawm a, inkhawm hi Serchhip High School Headmaster Pu S. Vanlalchhunga’n a kaihruai a ni.