Pu Lalsawta, Taxation Minister chuan vawiin khan ni 5 awh tur National Academy of Customs, Excise & Narcotics (NACEN) leh Taxation Department-te huaihawt Goods & Services Tax (GST) Level-IV Training Assembly Annexe-a neih chu a hawng.

Pu Lalsawta chuan Mizoramah GST hlawhtling taka hman a nih theih nan training buatsaih a ni chu lawmawm a tiin GST chungchang hi zirchian a tul thu a sawi a. GST hi India rama Taxation Reforms lian ber a nih thu sawiin Minister chuan bungraw man a tih hniam a beisei thu sawiin, thil danglam chungchanga training a nih dawn avangin trainees te chuan uluk taka an zirte chu hrechiang a, an hnathawhna ah an hman tangkai ngei a beisei thu a sawi a. He dan thar hnuaiah hian chhiah khawnna huang tih zau belh a ni ang a, kalphung langtlang tak a nih dawn avangin awlsam zawk leh chhiah pek pawh tha zawk tura beisei a nih thu a sawi bawk.

India ram pumah chhiah lak dan kalphung thar Goods & Services Tax chu April 1, 2017 atanga hman tan tura ruahman a ni a. GST hian bungraw man a tihhniam beisei a nih avangin kan thil siamchhuahte ram chhung leh ram pawn a hralhchhuahnaah nasa takin a pui ang a, chu chuan ram hmasawnna a thlen ngei dawn niin zirtute chuan an sawi. State hrang hrangte chhhiah lak dan in an lohna avanga harsatna awm thinte pawh a tih ziaawm beisei a ni bawk. He dan hian chhiah petute tana harsatna awm thin chhiah inchherchhuan chu a ti bo tawh ang a, ram pum huap sumdawnna hmun khata min hruai lut tura kawng pawimawh tak a ni.

GST-hi a taka hman a nih theih nan inbuatsaihna pawh kalpui mek zel a ni a, Level-I Training (Source Trainers’ Training)-te, Level-II Training (Master Trainers’ Training)-te, Level-III Training (Trainers’ Training)-te neih tawh a ni a. Tunah hian Level-IV Training ( Tax Officials’ Training) neih tan a ni. GST (Level-IV) Training hi Taxation Department hnuaia Officer-te bakah Customs, Excise & Services Tax Officers state chhung mi leh pawn a mi 60-in vawiin ni 3.10.2016 atanga ni 7.10.2016 chhung an nei dawn a ni.