Kar hmasa zirtawpni leh inrinni khan Finance Minister Pu Lalsawta chuan hmar tlangdung a fang.

Saiphai, Saipum leh N.Chawnpui-ah te public meeting-ah thu sawiin, Pu Lalsawta chuan intodelh tur mai ni lo, thawh chhuah hmanga hausa turin hna thawh a tul, a ti a. Mizote hian hma sawn kan duh a, kan thei bawk a; tu emaw nih loh vanga thei ve lova kan inngaih tlatna hi kan mutan a ni tiin, chu chu kalsan a hun tawh thu a sawi. Hma sawn turin a thu mai ni lo, a tak taka thar chhuah tam kan mamawh tiin, kan nihna ang taka lan ngam a tul tawh a ni, a ti a. Compensation lak kan tum thinna pawh hi ngaihtuah chian a, kan ram ruaka kawng an laih vang hian kan retheih phah sawt em, kan rama an thil dah hian kan ram hlutna a belhchhah zawk em, tih te ngaihtuah a, ram tana thawh tumna rilru put zawk a pawimawh thu a sawi bawk. Finance Minister chuan sawrkarin mipuite hnenah tanpuina ni lovin, tang puihna zawk pek a tum thu a sawi a ni.

Pu Lalsawta chuan Tuirial Hydro Electric Project hna kal mek chu a hmunah a enfiah a. He Project-a Head, NEEPCO General Manager (Civil) PK Bora leh a hote’n lo dawngsawngin, an hna thawh dan te, an hmachhawp leh ruahmanna te leh harsatna an neih te chu a hnenah hian an lo thlen a. Minister chuan an harsatnate chu sutkian dan kawng zawnpui tiamin, hna chu a hun takah zo hman tura theih tawp chhuah turin a chah. NEEPCO Complex-ah hian Minister chuan thing a phun bawk.

Engineer-te sawi danin, Tuirial HEP-ah hian hna 75% chu an zo tawh a. Tui khuahna (dam) leh power house te siam mek a la ni. Tuirial HEP-ah hian MW (Megawatt) 30 ve ve siam chhuak thei tur khawl unit 2 a awm dawn a. Unit khatna hi June 2017-a peih fel hman tum niin, unit hnihna hi September 2017-a peih fel hman beisei a ni.

Minister hian Serlui B Small Hydel Project pawh tlawhin, a enkawltu engineer-te nen an inkawm a. Anni hian he Project chungchang leh dinhmun te an lo hrilh bakah, tluang taka Project kalpui a nih theih dan tur leh harsatna awmte chin fel dan tur an sawi ho bawk.

Serlui B SHP hi kum 2010 laihawl atang khan a tlan tan a. MW (Megawatt) 4 theuh pe chhuak thei tur khawl unit 3 bun a ni a. Unit khatna leh unit hnihna hian hna thawk tawhin, unit thumna pawh hi kum 2017 tawpah chuan peih fel hman tum a ni. Unit hnihna khawl hi a chhiat rih avangin tunah chuan MW 4 chauh siam chhuah theih a ni leh rih a; khawl chhia hi siam that leh thuai tum a ni. Serlui B SHP hi Bilkhawthlir-a P&E Thermal Project Division enkawlna hnuaia awm a ni.

Finance Minister hian Bilkhawthlir khawtlang hruaitute leh party hruaitute nen pawh inkawm hona hun an hmang a. Anni hian a hnenah khawtlang mamawhte lo thlenin, a theih anga hma lakpui turin an ngen.

Minister hian Bilkhawthlir Primary Health Centre chu tlawh bawkin, thawktute'n a hnena an harsatna leh an mamawh an lo thlente chu a theih anga bawhzuipui a tum tur thu a sawi a. Chemphaia kuhva vawn thatna hmun (kuhva scope) tur buatsaih mek pawh a hmunah tlawhin, hna kal mek a enfiah a. Tangkai zawk leh daihzai zawka hman dan tur ngaihtuah turin a chah bawk.

Finance Minister hi a zinnaah hian MPCC (Media) lam atangin Pu Thanglawra leh I&PR Department atangin IPRO Pu C.Lalhruaitluanga te’n an zui a ni.