Mizoram flagship Programme NLUP hi a dawngtu thawk tha peihlo leh hlawhtlinpui lo apiangin an sawisel thin Minister Pu PC Lalthanliana chuan a ti. He thu hi nimina AH & Vety Dept. hnuaia vawkvulh thlangtute hnena NLUP thawh thumna leh thawh lina Farm veng Community hall-a semnaah sawiin Minister chuan NLUP Sawrkarin min pek hi tun hun mai ni lo kan thlah kal zelte tana eizawnna rotling siamna atan hmang ila, tunah phei chuan Aizawl khawpui chu bawnghnute ah phei chuan a intodelh hle tawh a, Lunglei district pawh kan intodelh a, hralh sen loh kan neih hunah chuan sawrkarin leiin Anganwadi ah te pawh nitin naupangte in turin kan sem dawn a ni a ti.

Kuthnathawktute in hlawhtlin chuan sawrkar hi a hlawhtling tihna a ni a, Vawkte sem tawh ngaihtuahin vawkte khaw chhaklam atanga chawk luh a la ngai fo mai te hi kan in enfiah a ngai hle a ni a ti. Sawrkar chuan hmachhawp thar New Economic Development Policy atangin cheng vaibelchhe 250 zet a dah leh dawn a, heta tang hian dawmkan ngai leh a ti tha, thawkrim peihte chauh a tanpui dawn a ni a ti bawk.

Pu Zathangliana Coordinator NLUP Lunglei pawhin thu sawiin Sawrkar chuan kuthnathawktute dawm kan nan sum engemawzat semin a tih tur a ti a, a dawngtute hian kan tih ve tur rinawmna leh taihmakna nena, hlawhtling tura kan thawh a ngai a ni a ti bawk.

Vawiin a Vety Dept hnuaia NLUP dawngtute hi Lunglei North bial atangin mi 202 niin Rs. 28,000 theuh vawk vulhna tur sum hmahruai an dawng a, a semna inkhawm hi Dr. Vanlalbuanga DVO Lungleiin a kaihruai a ni.