Nimin khan Parlimentary Secretary Pu Joseph Lalhimpuia chuan Bilkhawthlir Community Hall-ah Pawl 10 leh Pawl 12 pass tharte lawmpuina programme, Mizo Zirlai Pawl (MZP) Sub-Headquarters, Bilkhawthlir te’na an buatsaih chu khuallian niin a hmanpui.

Pu Joseph Lalhimpuia chuan tunlai khawvel thang chho zelah zirna, hriatna leh thiamna chu thiltihtheihna leh ropuina anih thusawiin zirna chu ram leh hnam humhalhna atan hmanraw pawimawh tak a ni, a ti a. Zirlai pawl dinchhan chu zirlai te hamthatna anih thusawiin zirlai pawl ten hemi kawngah hian nasa takin hma la in, zirlai te hmakhuana an ngaituah chu lawmawm a tih thu a sawi bawk.

Parliamentary Secretary chuan Mizoramin zirna lamah hma a sawn dante sawiin Science leh Mathematics zirtirtu tur Middle Sikul tan lak an nih tawh thu leh High School tan pawhin hetiang zirtirtu la turin ruahmanna a kal mek tih a sawi a. Mizo medium leh English Medium sikul te zir a in an theih nan lehkhabu inang Primary level ah 2014 atanga hman a nih tawh thu te sawiin Sawrkar Laipuiin Education Policy thar a puan hnua Middle sikul level ah pawh zirlai bu thuhmun, Mizo medium leh English medium tan neih tum a nih thu te sawi bawk a. Mimal ina zirlai te tana Hostel an din te zirlai hmakhua ngaituah a, a tha zawka enkawl leh khuahkhirh anih theih nan a enkawlna dan te siamin hman tep anih thu a sawi bawk.

Kumin HSLC leh HSSLC pass percentage nikum aia tha chu lawmawm tiin hei hi zirlai te, zirtirtu, nu leh pate leh zirlai pawl te thawhrah leh tanho avangin a ni a ti a. Bilkhawthlir MZP Sub-Headquarters hruaitu ten zirlai titha te chawimawina atana sum tuakna atan an mahni an inhlawh chu fakawm a tih thu a sawi bawk a ni.