Vawiin chawhma khan Mizoram Secretariat Complex-ah NEDP hnuaia project pawimawh tak, Development of Indigenous Technological Innovation in Mizoram (DITIM) hmalaknain khawl hrang hrang leh thil tangkai tak tak siamchhuahna tur in, Innovation Facility Centre (IFC) building sakna tur lungphum Planning Minister, Pu Lalsawta’n a phum a. He programme hi Mizoram Science, Technology & Innovation Council (MISTIC), Directorate of Science & Technology buatsaih a ni.
Minister Pu Lalsawta chuan Innovation Facility Centre (IFC) building sakna tur hmun tha a awm thei chu lawmawm a tih thu a sawi a. India ram chu innovation lamah hma a sawn thu sawiin khawvel ram za chuang tehnaah India chu 60-na a nih thu a sawi a. Sawrkarin Innovator-te chu theihtawpa tanpui a tum thu sawiin anni tan hemi Centre pawh hi din a nih thu a sawi a. Innovation Facility Centre (IFC) chhungah hian khawl hrang hrang dah tum niin hengte hi kan hman tangkai chuan entrepreneurship lamah hma kan sawn ngei dawn a ni, a ti a. Mizo zingah thil thar ngaihtuah chhuaktu bakah heng ngaihtuahnate a taka chan tir tumtu kan nei zel a, Mizo thalaite pawhin an hnung zuiin thil tangkai tak tak ngaihtuah chhuah bakah an siam chhuak thei a ni, a ti a. Ram hmasawnna tura kan innghahna lian ber chu thalaite an ni tiin IFC pawh hian kan ram dinchhuahna kawngah thalaite tangkai takin a pui dawn a ni, a ti.
Innovation Facility Centre (IFC) Building hi cheng nuai 128 vela sak tur niin L.B. Associates-te sa tura thlan an ni a. Khawl hrang hrang dah tum niin innovator-ten heng khawlte hi hmang tangkai hle tura beisei an ni. DITIM Project-in a tum chu- Mizoram chhunga mite thil hmuh chhuah leh siam chhuahte chawi nun saka thil tha zawk an siam theihna tura Science leh Technology hmanga tanpui te, Mizoram chhunga Innovator-te thiamna ram hmasawn tak tak theih tura hmalakpui te, Innovator-te mumal zawka tanpuina tura ruahman te, Innovator-ten sum sen tlem zawk an hman theih tur khawl tha zawk IFC-ah chhawp chhuah sak te, Innovator-te ngaihtuah chhuahte IPR dan hmanga vawnhim kawnga hmalakpui te a ni.
Planning Secretary Dr. C. Vanlalramsanga chuan kalkhawmte lawmna thu a sawi a. Chief Scientific Officer leh Mizoram Science, Technology & Innovation Council Member Secretary ni bawk, Dr. R.K. Lallianthanga atangin report ngaihthlak a ni a. Local Innovator Pu Lalbiakzuala Ralte, Agarbati Stick leh kuhva thel faina khawl lo siam chhuaktu chuan thu sawina hun a nei a. Senior Scientific Officer Pu Samuel Lalmalsawma chuan lawmthu sawina in hun a khar a. He hunah hian DITIM Implementing Committee memberte, Science & Technology-a thawkte leh Innovator-te an tel a ni.
