Mizoram Sawrkar hnuaia Department of Personnel & Administrative Reforms leh Mizoram Civil Service Association te tangkawpina Mizoram Civil Service officers te tan ‘Towards Responsive Governance’ tih thupui hmanga ni khat awh Workshop vawiina an buatsaih, chawhnu session chu Education Minister Pu Lalsawta’n Assembly Secretariat Conference Hall-ah a hmanpui. Workshop chawhma session ‘Development Session’ tih chu Chief Minister Pu Lal Thanawla’n a hmanpui a ni.
Keynote Address a pek naah, Pu Lalsawta chuan Sawrkar a ni emaw, Kohhran a ni emaw leh tlawmngai pawl a ni emaw enkawlna, kaihhruaina leh thununna te (supervision, direction leh control) a pawimawh a, heng thil te hi neih thata, a mumal chuan an kalkawng a mam thei a, an hnathawhte pawh a hlawhtling zawk thei a ni, a ti. Changkanna leh hmasawnna (development) chungchang sawiin Pu Lalsawta chuan ram rethei (under-developed countries) te chuan an ram hausakna (resources) an neih ang ang te an enkawl that loh avangin an ram a rethei thin a, ram rethei ai mahin ram enkawlna thalo (under-managed countries) an nih zawk thin thu a sawi. Confucius-a sawi ‘Ram enkawlna leh kaihruaina a that naah retheihna chu thil zahtlak a ni a, Ram enkawlna leh kaihruaina thalo ah chuan hausak a zahtlak’ tih chu dika a hriat thu leh tunlai khawvelah he thil hi ngaihtuah chian a tul hle a a hriat thu Pu Lalsawta hian a sawi bawk a ni.
Chawhnu session hi Pi Ramdinliani, Joint Director, Administrative Training Institute-in a kaihruai a. Chief Guest Pu Lalsawta’n keynote address a neih hnuah Administrative & Good Governance Initiatives thupui hmangin Pu LR Thanga, IFS, Principal Secretary to Chief Minister-in power point presentation a buatsaih a. Hemi hnuah hian Land Revenue Administration Mizoram : Issues & Concerns tih thupui hmangin Pu RL Rinawma, IRS, Principal Secretary, Land Revenue & Settlement-in presentation a pe bawk. Heng presentation an pek te hi sawizau leh sawihovin Mizoramin hma a sawn theihna atana thil pawimawh hrang hrangte ngaihtuah ho a ni.
Chawhma session Pu K. Lalthawmmawia, President, MCSA chuan kaihruaiin, session thupui chu NLUP: Issues and Prospects tih a ni a. NLUP chungchanga Sorkar hmalakna hrang hrang tarlanna power point presentation Pu PL Thanga, IAS (Rtd) & Vice-Chairman, NLUP Implementing Board-in a nei bawk a. He workshop-ah hian NLUP chungchang chipchiar taka sawi niin Panel of discussion Moderator-ah Pu R. Selthuama, MLA & Chairman, NLUP Implementing Board ruat a ni a, panel of experts zingah Pu PL Thanga; Rev Dr K Thanzauva, BCM; Pu Vanlalrema Vantawl, Vice-President, MJA; Dr James LT Thanga, Dept of Economics, Mizoram University te ruat an ni bawk.
MCS officers te tana sorkar hmalakna pawimawh leh inrelbawlna chungchang sawiho leh thlirhona workshop buatsaih hi a vawikhatna a ni a. Sorkar-in hetianga workshop pawimawh tak MCS officer te tana a buatsaih hi MCSA pawh a lawmin zawngchhang tlak an ti hle a ni.
