Home Minister Pu R. Lalzirliana chuan vawiin khan Champhai DC, Home, LAD, Revenue, DM&R Department aiawhte bakah tlawmngai pawl hrang hrang CYMA, MZP, MSU leh MKHC te chu Secretariat Conference Hall-ah kokhawmin Saikhumphai chungchang a sawipui. He meeting pawimawh takah hian LAD Minister Pu P.C.Lalthanliana, Parliamentary Secretary Pu Lalrinmawia Ralte, Parliamentary Secretary Col.Z.S.Zuala bakah MLA Pu T.T. Zothansanga te pawh an tel a ni.

 

Home Minister Pu R. Lalzirliana chuan Saikhumphai chungchangah sorkar che muang anga sawi chu a dik lo tiin he thil thleng chungchang hriat a nih veleh sorkar chuan chhawmdawlna hna chi hrang hrang a theih anga rangin a thawk nghal a ni tih a sawi a. Saikhumphaia chengte tan dal, tel, chi, puan sin tur, bungbel, thosilen, silpauline leh tul dangte a thawn nghal a. Saikhumphaiah hianPolice platoon 3 pawh dah a nih thu leh thla 2 chhung a thlawnin ration pek a nih tur thu a sawi bawk.

 

Vawiin meeting thurel pawimawh tak tak zingah Saikhumphai mipuite tana Relief Camp buatsaih te, an hriselna lam ngaihtuah sak te, an fate zirna khaihlak lova sikul an kal zawmna tur ngaihtuah sak te bakah venhimna lam hna tha taka thawhte a tel a ni.

 

mn