Tun hnaia ruahsur leh thliin Mizoram district hrang hranga chenna in a tih chhiat chungchang sawiho turin vawiin tlai khan Chief Minister Pu Lal Thanhawla chuan Chief Secretary charge la mek tu Ashwini Kumar, Disaster Management & Rehabilitation department hotulu te leh Aizawl District Magistrate te a office ah a ko.

Sawihonaah hian Chief Minister chuan central sorkarah tanpuina dil thuai anih theih nan ruah leh thliin chenna in a tih chhiat te chu chiang taka finfiah thuai turin a ti a. Mizoramah hetiang khuanurel chhiatna a thlen hian tlawmngai pawl ten in an sak sak thin hi central lama rawn endiktu ten in chhia an hmuh tak thin loh avangin an hrethiam thin lo tih a sawi a. Chuvangin in chhiate hi thla la vek turin a hriattir a ni. Tuna chhiat tawkte hnenah tanpuina lailawk Disaster Management & Rehabilitaion department atangin pek nise a ti a. Hei bakah he department tho hian district tinah tanpuina tur sum pe nghal bawk turin a ti a ni. DM&R Secretary Pu P.C. Lawmsanga chuan tanpuina tur sum a awm thu sawiin, Aizawl district tan Rs.25 lakhs, Lunglei tan Rs. 20 lakhs leh district dang zawng tan Rs.15 lakhs theuh pek tum mek anih thu a sawi bawk.