Vawiin chawhma khan Horticulture Conference Hall, Aizawlah Mizoram Florists’ Association chuan General Assembly vawi 11-na an hmang a, Finance Minister Pu Lalsawta chu khuallian a ni. 

Finance Minister chuan pangpar chingtute leh kuthnathawktute dang ten an tharchhuah an pho lanna tur hmun tha tak siam chu sawrkar in a ngai pawimawh a, hetiang atana hman theih tur Agriculture Growth Centre chu buaipui mek anih thu a sawi a. Florists ten kum tam tak tha thlah lova pangpar chin leh enkawl an buaipui tlat avangin an zingah ram danga thawnchhuak thei hial an awm tawh a, sum lakluhna atana tangkai taka hmang mi entawntlak tak tak an awm a ni, a ti. Mizoram sawrkar hmalakna thar New Economic Development Policy (NEDP) chungchang sawiin Pu Lalsawta chuan mi taima leh teirei peih, a ngaihna hriate tan sawrkarin kawng a hawng dawn a, florists te pawhin he hmalakna tharah hian hmun pawimawh tak an luah theih nan ngaihtuahna seng turin a fuih a ni. 

He hunah hian Mizoram Florists’ Association buatsaih lehkhabu “Pangpar Chingtute Thian” tih chu Finance Minister hian a tlangzarh nghal bawk a ni. 

Mizoram Florists’ Association General Assembly inkhawm hi an President Pi Lalnuntluangi’n a kaihruai a. General Secretary Pi Liansangpuii’n an pawl hmalakna tlangpui a tarlang a. Financial Secretary Pi Lalrintluangi’n lawmthu sawiin hun a khar a ni.

Attachment

  • Loading attachment...