Vawiin khan Mizoram Law College chuan an college a zirlai lut thar lawmluh ni (Fresher’s Social) an hmang a, Parliamentary Secretary Pu Lal Thanzara’n a hmanpui a ni.

Pu Lal Thanzara chuan ukil leh dan lam mithiamte kutah hian thiltihtheihna sang tak a awm a, an hman that leh that lohin thui tak kan ram kal zel dan tur a hril thei a ni a ti a. Zirlai a fuihna thu a hian Pu Lal Thanzara chuan Dan leh Hrai zirlai te chu Mihring nun khawih danglam thei, tan in a tan tir leh tan tir loh mai bakah, thihna hial thlen thei khawp a thuneitu dinhmun a ding thei an la nih dawn avangin, an hnathawhna(practice) mai ni lovin, mimal nunah pawh Ethics dah pawimawh turin a chah a ni.

Parliamentary Secretary chuan ukil te tel lo in dan in ro a rel thei lo a ni tiin engkimah fimkhur tak leh uluk takin, ngaihtuahna fim hmanga hma la a, dikna humhimtu an lo nih theih nan, chutiang rilru chu an zir tan tirh atanga pu turin dan leh hrai zirlaite hi a fuih a. Dan awm sa en nawn a, siam that ngai awm te siam that rawt turin, a tul anga dan thar duang tura Sawrkar-ah rawtna thlen turin leh Sawrkar Laipui dan hrang hrang te Mizoram a hman ve a tan tha ni a an hriatte Sawrkar ah rawtna siam turin Law Commission din a nih thu a sawi bawk a ni.

He hunah hian Dr. Rualkhuma Colney, Principal, Mizoram Law College pawhin thu a sawi a, zirlai pass chhuak te chu ngaihhruina a hlan bawk a ni.