Vawiin khan Minister of State, Pu Lal Thanzara chuan Vaivakawn leh Mizoram University inkar kawng siamthat hna thawh mek chu a hmunah kalin, chipchiar takin a enfiah.

Pu Lal Thanzara hi Aizawl West-I bialtu MLA, Pu K. Sangthuama, PWD Engineer-in-Chief, Pu Lianchungnunga, Chief Engineer, Pu K. Lalsawmvela leh department hotuten an tawiawm a; Vaivakawn leh MZU inkar kawng siam that hna thawh mek chu uluk taka enpuiin, hnathawh kal lai mek hi chak zawka thawh a nih theihna turte an sawiho bawk.

Vaivakawn leh Mizoram University kawng 10.500 km a thui cheithatna atan hian sorkar laipuia Ministry of Urban Development hnuaia JNNURM atangin cheng nuai 1907.64 sanction hmuh a ni a; first instalment atan cheng vaibelchhe 4.2922 sorkar laipui atangin release a ni tawh a. State Share cheng vaibelchhe 0.4769 release tawh niin, pawisa la hmuh tur hi cheng vaibelchhe 14.32 a ni.  Kawng pumpui hi metre 8 a zaua ruahman niin, metre 5 a zaua black top tur a ni bawk.

Kawng laih zauh hna hi GP Project Ltd. Club Road, Silchar hnenah ni 11 Sept, 2012 ah work order pek niin, ni 20 Nov, 2012 ah hna tan a ni a, work order amount chu cheng vaibelchhe 1.57 a ni a, a hna hi Oct, 2013 khan zawh tawh a ni a. Kawng hi a tul lai hmunah zauh niin, 3.660 km thawh a ni. Pavement siam hna hi Sunshine Overseas Pvt. Ltd., Tuikhuahtlang hnenah pek niin, work order hi 5 Nov, 2012 khan pek a ni a, work order amount chu vaibelchhe 10.04 niin, a hna hi kum khat chhunga zawh tura tih a ni. Permanent works atan cheng vbc 6.896 leh Contingency ah vbc 00.55 ruahman a ni bawk.

Kawng siam hna kal mekah hian hian kawng chhe zual lai Ropaiabawk leh  Ramrikawn inkar 2.500 km a thui lung phah mek hi January thla chhung ngei hian Bituminious hna pawh zawh hman tum a ni a; heng bakah hian Culvert thar 5 siam zawh tawh niin, culvert awmsa 15 zauhte, retaining wall 1602.00 Rm siamte, lined side drain 7.50 km te siam tura ruahman a ni a; lined side drain hi 6.10km zawh tawh niin, retaining wall hi 480 Rm zawh tawh a ni a; Culvert awmsa zauh hna hi zawh tawh niin, drain link hi 230 metre zawh tawh a ni bawk.

Hemi kawng siamthatna tur atana kawngin a paltlang veng hrang hrang Local  Council/ YMA te leh mimal tanpuina leh puihnaah Department chuan lawmthu a sawi a ni.