Vawiin chawhma dar 10:00 AM khan Pu L.H.Shanliana IPS, DIG Southern Range chuan Saiha Circuit House-ah Saiha District MJA te a kawm. Pu Shanliana chuan Mizoram chhimlam awptu tur DIG Southern Range Lunglei post hi kum 2008 a siam ni tawh mahse, Lunglei hmun ngeia thutchilh a, he hna vuan hi an awm manglo a ni, a ti. December ni 19, 2012 atanga he post hi vuanin, Lunglei hmunah ngei thutchilh in he hna hi a thawh thu a sawi a. Tunah hian Chhimlam District Pathum, Lunglei, Lawngtlai leh Saiha chhunga Police Force awm zat chu Sanction Strength 899 niin, Actual strength erawh 656 a ni a; vacancy hi post 146 a awm mek thu a tarlang a. 2nd MAP battalion tiam chuan chhimlam district pathum a force mi awmzat chu: sanction strength 1784 niin,actual strength erawh chu 1533 a ni a, vacancy post 258 a awm mek thu a sawi lang bawk.
Pu Shanliana chuan 3rd IR Batallion pawh Thingkah ram chhunga awm tura ruahmanna siam vek tawh niin, a hmunhma pawh samfai vek tawh a nih thu a sawi lang bawk a. Heng khua Tuipang, Sangau, Lunglei, Tlabung, Bunghmun leh Vaseikai-a Police station sak nan te, Lawngtlai-ah outpost sak te leh Saiha-a SDPO Quarters sak nan te hian 13th Finance Commission 2013-2014 chuan cheng nuai 800/- a allot thu a sawi lang bawk a.
Pu L.H. Shanliana IPS, DIG chuan Law and Order kenkawh kawngah Mizoram hi state dang ngaihtuah chuan kan tha viau thin a, mahse tun hnai kum tlemte kalta atang khan Mipuiin chin tha lo deuh kan ching thar a. Mipui inhawrkhawm a Police custody-a awm tawh ‘mitang’ chu mipuiin “a hmel tal kan hmu duh” ti a, Police Station emaw; jail emaw nawr vak kan ching thar hi a pawi hle a, sim vat chi a ni, chutilo chuan Mizoramah hian Rule of Law a awm thei ngai lo vang a ti. Mipuite leh Police te inkara thawhhona tha tak nei tur chuan Mipuiten an chunga rinna an nghah ngam tur khawpin Police lam pawh an thawh a ngai a. Mipuiten police kut an tichak thei nana zirtirna pe a, police te pawh finchhuah thin tur chuan MJA hi an pawimawh ber a ni, a ti bawk.
Pu Shanliana hi Arunachal Pradesh-ah sawn tawh a ni a, a kal hmain Saiha Mipuite, NGO hrang hrang te leh MJA te chunga DIG Southern Range-a a awm chhunga an lo tawiawm thinna avanga lawmthu sawi paha farewell tour-a lo kal a ni.
Pu Shanliana hi Saiha SP Pu Raj Kumar Singh IPS, PU J.Laichha DSP, Lawngtlai SDPO Pu Vanlalduha leh Pu N.Vabeiratlua I&PRO, Saiha District ten an tawiawm a ni.
