Vawiin khan Home Minister Pu R.Lalzirliana chuan Seling, Keifang leh Mualpheng khua te a tlawh a. Seling leh Keifang ah quarry a hnathawkte hman turin safety helmet Labour, Employment & Industrial Training Department(LE&IT) chahchhuah a sem a. Mualpheng ah Health Department huaihawt 'Typhoid Clinic' a hmanpui a ni.

Home Minister chuan Mining Helmet a semna ah Sawrkarin kuthnathawk a eizawngte a ngaihpawihmawh thu sawiin an hriselna bakah an taksa himna te ngaipawimawh hmasaa rinawm taka thawkzel turin a chah a. Quarry hmuna lung la a eizawngte chu an himna atan leh hamthatna awm theite an hmuh theih nan LE&IT Department ah registration fel taka in ziak lut tur in a chah a. Eizawnna chu eng hna pawh nise zahpui mai lova, taimakna leh rinawmna nena thawh a nih phawt chuan zahawmna leh hlawhtlinna te a awm vek a ni a ti. NLUP hmalakna ah pawh sawrkar chu a thutiam ah dingtlat in NLUP tanpuina dawngtu te tan a rinawm a. NLUP dawngtute pawhin an vanneihna te hi hrechianga rinawmna nena Sawrkar hmalakna an chhanlet a ngai a ni a ti. Hnathawh theih nan hriselna neih a pawimawh hmasak thu, 'Typhoid clinic' hawnna in khawm ah hian sawiin Damdawiin pan nachang te leh dammawh hritlan chang pawh a, rang taka doctor-te rawn thin a pawimawh thu a sawi a ni.

Tunhnai khan Mualpheng-ah Typhoid vei tam tak hmuh chhuah a ni a. Hei hi Health Department chuan a hmun ah kalh chilh a zirchian tha in a hria a. Vawiin khan Dr. Zothantluanga, Medicine Specialist, Dr.Doris L.Sailo, Paedriatrics Specialist, Dr. C. Lalliankimi, M.O., Dr. Christina Lalnuntluangi, House Officer, Pharmacist-te, Nurse-te, Laboratory Technician-te leh mithiam dangte chu Mobile Medical Unit keng in damdawi-te leh hmanraw chikim nen Aizawl Civil Hospital atangin 'Typhoid Clinic' buatsaih hian Mualpheng an thleng a. vanneih thlak takin puitling 179 leh naupang kum 12 hnuailam 87 endikte zingah Typhoid vei hlauhthawn anga tam hmuh an ni lova. Puitling in endik zingah pumpui lawng an tam bera, naupang damlo endik te zingah erawh chuan hritlang awmna an tam ber thung a ni.

Home Minister hnen atang hian Keifang quarry a hnathawktu mi 60 leh Seling quarry a hnathawktu mi 40 ten Mining helmet an dawng a a. Mualpheng khua a Presbyterian English School hnenah Computer set 1 leh printer a pe bawk a ni.