Nimin Dt 9.5.16 khan Minister of State for AH & Vety Pu C. Ngunlianchunga chuan Lawngtlai kiang Mampui khuaa AH & Vety Farm Complex a tlawh a, hmasawnna hnathawh hrang hrangte an en.

Pu C. Ngunlianchunga chuan, kan ramin sa, bawnghnute leh ran note thar kawngah mahni intodelh tumin theihtawp a chhuah mek a. Chu mi hmalakna pawimawh berte zinga mi chu Mizoram chhim lam tana Mampui Farm tih changtlun hi a ni. He hmunah hian vawk chi lakna te, Ar note awpkeuna te, Bawng inthlahpun tirna tur te, Vawk note tihpunna tum hmunte dah a ni a, heng hmalakna te hian a nih dan tur anga hna a thawh hunah chuan nasa takin ran vulh lama eizawnnaah kan kang dawrh thei dawn a ni, a ti.

Heng hnathawh hrang hrangte hi Article 275 hnuai atangte, National Livestock Missions hnuai atangte, National Programme on Cattle & Buffalo Breeding Programme atangte leh thil dang dang atang tea thawh mek an ni hlawm a. Infrastructure lam phei chu reiloteah thawh zawh thuai beisei an ni hlawm.

Minister hi Aizawl atangin AH & Vety Officer pawimawh tak tak, Dr. Saihlira, D.D Planning te, Dr. Lalhmingthanga, DD, F&FD te, Dr. Lalrinawma Khiangte, Sr. VO (AI) leh Pu Hmingthana, JE ten an rawn tawiawm a ni.