Vawiin chawhma dar 11 khan Vanapa Hall-ah Mizo Zirlai Pawl (MZP) ten HSLC Examination 2016 Top Ten-a Mizo tlingte chawimawina an buatsaihin a. Home Minister Pu R. Lalzirliana chuan khuallian niin he hun hi a hmanpui a ni.

Khuallian, Home Minister Pu R. Lalzirliana chuan zirlaite chu thuawih nun nei tura fuihin, “Thuawihna hi dinhmun siamna pawimawh ber a ni,” a ti a. Zirlaitetan politics ngaihven reng a tul rualin zirlai thulha politics luhchilh erawh a la hunlo tih sawiin Khuallian chuan, “Mizoram sawrkar hnuaiah pawh mithiam tak tak tan hnathawh tur tam tak a la awm a ni,” a ti bawk. Home Minister chuan Mizoram sawrkarin MLPC Act a hman hi zirlaitetan a ni lo tih sawiin zirlaite chu nawmchenna dik lova hun khawhral lo turin a chah a, “Tlai khawhnua inchhir leh mahni intihhlumte hian sawtna a nei tawh lo,” tiin zirlaite a fuih bawk.

Kumin HSLC Exam Top Ten-a Mizo tlingte chawimawina hun hi MZP Vice President Pu B. Vanlaltana chuan kaihruaiin, General Secretary Pu L. Ramdinliana Renthlei hnen atangin MZP hmalakna leh hmachhawpte ngaihthlak a ni a. MZP President Pu Lalsangzuala Ngente pawhin zirlaite lawmna leh fuihna thuchah sawiin, “Zirlai kan chawimawite hi kan thlir reng dawn che u a ni,” tiin zirlaite chu an nu leh pa leh mithiamte rawn chunga hmalam pan turin a chah bawk.

MZP hian kum 21 chhung hlawhtling takin HSLC Exam top ten-a Mizo tlingte chawimawina a lo buatsaih tawh a. Kuminah hian HSLC top ten-a Mizo tling mi pakuate hnenah lawmpuina thuziak leh tangkafai bakah mi inphalte thilpek engemawzat an hlan tel a ni. Vawiina MZP-ten chawimawina an pek zirlaite chu – C. Vanlalnghaka, Vanlalruatdiki, R. Lalrinsanga, Angela Vanlalhmangaihi, C. Lalnunhlimi, Vanlalhruaitluanga, Lalruatdika Renthlei, Lalawmpuia leh Malsawmtluangi te an ni.