Nimin May 7, 2009 khan Pu P.C.Zoramsangliana, Minister chuan Serchhip District MZP General Conference vawi 3-na a hmanpui.

He huna thu sawiin Pu P.C.Zoramsangliana chuan, “Zirlaiten India hnam tawngpui ber Hindi thiam nal tum ula, in hmaa chhuak zirtur apiang theihtawpa zirin, mi tih theih chu ti thei ngei turin in thluak sawizawi ula, ram leh hnam tan mi chhawr tlak in ni thei ang,” a ti.

Zirlai pawl hrang pathum lai awm chu tha ti lovin, Mizo Zirlai Pawl hi pakhat chauh ding se, MSU, AMSF te awm hrang lo nise sawrkar leh mipui tan a zahawm zawk anga, thil a tithei zawk bawk ang, a ti.

Serchhip zirlai kalhawmte hnenah khuallian chuan, “In tih apiang Isua nen nise, Isua nena lehkha zirin, Isua nen ram tana mi tangkai nih tum rawh u,” tiin a fuih a ni.

Guest of Honour Pu H.Zarzika, Serchhip D.C. pawhin thu sawiin zirlaiten nasa takain lehkha zir ula, All India Services, MCS, MPS etc. a tling thei turin lehkha chhiar rawh u. Thildang nen zirlai hi kawp vak suh u, a ti. MZP hi Pressure Group anga miin an hmuh lohna turin tan la rawh u, tiin a chah bawk.

He Serchhip MZP Hqrs. General Conference vawi 3-na hian an District chhunga kum 2009-a HSSLC Exam-a titha - Distinction 7 leh First Division-a mi 56 te chawimawiin HSSLC - Arts/Science-a top ten zinga tel mi 7 te hnenah lawmpuina thuziak leh Rs. 1000/- theuh an pe a ni.

Pu Zoramsangliana hian Serchhip MZP Hqrs. tanpui nan Rs. 5000/- a pe a ni.