Vawiin chawhnu khan Schedule Tribe Girls Hostel, Serkawn, Lunglei cheng nuai 192.18 senga sak chu Social Welfare Department Minister Pu PC Lalthanliana'n a hawng. 

Hawnna inkhawm hi Pu Vanlalnghaka Royte, Deputy Director, Social Welfare Dept. in a kaihruai a. Khuallian Pu Pc Lalthanliana chuan thu sawiin ram a changkang a, hmasawnna pawh a chak a, Serkawn Sikulpui hi hmun pawimawh Chief Minister hlui Pu Laldenga leh Brig. Thenphunga Sailo te he sikul ah hian an lo zir tawh a ni tiin, Serkawn khawtlang leh mipui chu ram thilah an puitling hle a ni tih sawiin, Sikulpui bula ram tha tak ST Girls Hostel sakna an pek avangin lawmthu a sawi a ni. ST Girls Hostel hi kawng hrang hrangah hmeichhia te tan abika hamthatna sorkar laipuiin a siam pakhat a ni tih sawi langin, zirna senso hautak zir theihna leh awm theihna tura tih a ni a, Thingtlang kilkhawr zawk ami ten an chhawr tangkai ngei a beisei thu a sawi bawk. Pu PC Lalthanliana chuan a bial chhunga hmasawnna thenkhat tarlangin Melte ram Serkawn ah Stadium Puitling Vaibelchhe 24 seng a sak mek a ni a, Pukpui ah Remand Home Vaibelchhe 4 a sak tur leh Engeneering College sakna tur te, Kawmzawl panna kawng zauh blacktop hna nuai 24 hmang a thawh tur te, Social welfare dept. office tha tak godown Zotlang ah sak a nih bakah, Haulawng ah NELIT Centre leh Centre of Excellence for Fruits din a nih thu te a sawi a ni. "Hmasawnna tam tak hmuh tur a awm avangin a bial chhung a khua leh mipuite kan tanrual chuan Model Constituency ah kan siam theih ang" a ti a, Social Welfare dept. in ST Girls Hostel -13 sakna tur sorkar laipui atangin hmuh a ni a, chung zingah chuan Hostel 10 sak zawh tawh niin, 3 sak mek a ni a, Cheng nuai 29 sengin Social Welfare dept. in a thlawn vek a lehkha zir theihna Tuipang, Lawngtlai, Chawngte leh Ngopa ah sak tum a ni a ti bawk. Hmasawnna tha neih theih nan mipui sorkar tawiawm a pawimawh a, sorkar tan eng nge kan tih ve theih tih kan ngaihtuah a ngai ani a ti. 

Pu Sailiana Sailo, General Manager, NECS in ST Girls Hostel building sak report pe in, Social Welfare Dept. leh NECS in MOU an sign angin Serkawn ST Girls Hostel hi Turn Key basis a sak a ni a, Ministry of Tribal Welfare, Govt. of India in Tribal Hostel scheme a neih atangin Social Welfare dept. kaltlangin Project hi siam a ni a, he building sak nan hian cheng nuai 192.18 hman niin, 100% Central Funding a ni. Building hi January 2016 atang a sak tan a ni a, June 2017 a sak zawh a ni. Building hi chhawng thum a sak a ni a, hawnna inkhawm hi Pu R Laldinliana ,CDPO, Lunglei in lawmthu sawina in hun a khar a ni. 

ST Girls Hostel hawn hnu hian Minister hian Zotlang Tourist Lodge bula lei khi, min hlauhthawnawma awm mek chu a hmunah kalin a enfiah a, Zotlang VC leh YMA hruaitute nen a tul anga hmalak dan tur an sawi ho nghal a ni.