Tunhnaiah kawngpui dungah inhmun leh thildang atana lei laih avanga leimin in kawng a hnawh leh a thil a tihchhiat nasat bakah mihring nunna atan thleng pawha a hlauhawm theih avangin Aizawl District Bawrhsap Pu Kannan Gopinathan chuan Cr.PC Section 144 tlawhchhanin khapna thupek a chhuah.
Aizawl District Magistrate thupek chuan Aizawl District chhunga National Highways leh mipui vantlang zawh kawngpui dungtluan te huamin heng kawngpui sir tawn tawnah hian phalna la hmasa lova lei laih/paih a khap a. Kawngpui dunga lei lai duh te chuan District Disaster Managment Authority ah emaw Saitual leh Sakawrdai bik atan chuan Sub-Divisional Disaster Managment Authority atanga phalna an lak hmasak a ngai dawn a ni. A huntiam ral hma a tihtawp a nih loh chuan Aizawl Bawrhsap khapna thupek hian thupek chhuah ni atanga thla hnih chhung a awh ang.
