Vawiin khan Local Administrative Department (LAD) changtu Minister Pu P. C. Lalthanliana chuan Champhaia LAD Department hmalakna cheng 60, 25,000 senga sak ‘Champhai Park’ a hawng. Park hawnna hi Champhai North bialtu MLA Pu T. T. Zothansanga leh Champhai Bawrhsap Pu Lalthangpuia Sailo te pawhin an hmanpui a ni.
Pu P. C. Lalthanliana chuan Champhai Park chu a chhawr tangkaitu Champhai mipuite hnenah tangkai taka an hman atan a hlan a ni tiin neitu rilru pu a, thianghlim leh duat taka dimdawi taka enkawl turin a ngen. He hmun hi hmun hlu a ni tiin a ropuina aiin a hlutna a pawimawh a, Champhai ti nuamtu tur anih theih avangin he hmun hi khualzin leh Mizoram hmun danga atanga lokal te pawhin an tlawh chak khawpa lantir leh cheibawl a pawimawh thu a sawi. Park hi mimal chang nilo, pawl leh Kohhran te pawhin an hmang thei a, chumi atan chuan remhre taka thalai te tan intihhlimna hun duan leh buatsaih te kan inzir chho a pawimawh a ni, a ti bawk.
Khawvel thangcho zelah mipui leh thalai ten intihhlimna hmun leh hmun tha an mamawh a mahse Mizoramah duh anga hetiang hmun a awm loh thu sawiin Minister chuan LAD Department hmalakna in tuhnaia Mizoram hmun hrang hrang – Muthi, Lengpui, Thenzawl leh Hmuifanga Park hawn tak te hian mipuite tan chutiang lenna hmun tha a siamsak mai piah lamah hmasawnna bulpui pakhat a nih thu a sawi. Park-te hi Department leh Sawrkar chuan nawmchenna hmun tur ni lova, chen nawmna hmun atana a buatsaih sak a ni tih a hmangtu ten an thinlungah hre reng se tiin a duhthu a sawi bawk.
Bialtu MLA Pu T. T. Zothansanga chuan Champhai Park hawn tak chu Champhai tan hmasawnna chikhat a nih thu a sawi a, Park hlutna chu a chenchilhtu ten an enkawl danah thui tak a innghat dawn a ni, a ti. Tuhnaia Champhaia Social Welfare Department-in CDPO Office an dah leh LAD-in Champhai DLAO Office enkawltu MCS officer an dah avangin Sawrkar chunga lawmthu sawiin khualkhua atanga VC lo zin te thlen In tur Champhai VC House an mamawh thu te a sawi lang bawk a ni.
Champhai Park hawnna inkhawm Park tuala neih chu Pu K. Lalmuana, Addl. Secretary in kaihruaiin, Rev. Rammawipuia Pachuau chuan hunserh a hmang a, Pu Zosangliana, EE, LAD chuan Park sak chhoh dan leh a chanchin tlangpui Technical Report-a tarlang bawk a ni.
Champhai Park ram zau zawng hi bigha 6 niin a chhungah hian swimming pool zau tak te, Rest House leh Hall inkawp te, naupang infiamna thil te leh puipun ni atana hman theih bungrua hrang hrang a awmin a hmunhma hi mawi taka chei a ni. Park hi nitin hawn a ni dawn a, Chawlhni erawh chu Picnic-na atan hman phal a ni lo a, a luh man hi puitling tan cheng 10 leh naupang tan cheng 5 a ni. Picnic-na atana hawh man chu cheng 500 a ni.
