Horticulture Department Gazetted Officer in vawiin chhuna Bi- Monthly meeting an mahni Conference Hall-a an neih chu Pu PC Lalthanliana Horticulture Minister in a hmanpui.

Pu PC Lalthanliana chuan Horticulture Officer kalkhawmte hnenah chuan an department chuan a hun takah zel khel lova thla hnih dana meeting an nei thei ziah leh an department hmalakna leh hmachhawp te inhrilhna hun tha an nei chu fakin lawmthu a hrilh a. Kan ram budget leh sum harsat dan sawiin Minister chuan Department sum (Budget) indaihloh na avanga harsatna an tawhdan a hriatpui thu leh  Officer te chu an thiamna leh an finna te budget tangkai leh pawimawh takah hmang chhuak thiam a, kut hnathawktu leh loneitu te chhawr tangkai leh hlawkpui ngei tura chu an thiam, an finna budget chu chhawp chhuak tur in a sawm.

Horticulture tih hmasawnna turin Sorkar-in hma a lak pui dan hrang hrangte sawiin Minister chuan Horticulture College neih phalsak tawhin a hmun atan Thenzawlah ram tha tak neih a ni tawh chu lawmawm a tih thu leh tunah hian bawhzui tur te umzui zelin nakum atanga class neih tan beisei a nih thu a sawi bawk.

He meeting Pu R. Zotawna, Director of Horticulture kaihhruaiah hian Pi M. Vanlalzami, HDO (F) chuan Thailand-a Horticulture hmalakna zira an zin report pein a lem nen a entir a. Chumi hnuah Purun chin dan te, NLUP a an hmalakna te, RTI chungchang leh Khuai khawi dan te leh agenda hrang hrangte sawiho nghal a ni.

Pu C.H. Lalmuanpuia, DHO Saiha Horticulture Division chuan kum 2013 leh 2014 chhungin Straw Berry a hlawhtling taka an hmalak dan report a pe a. Rs. 19,77,400/- lai he theirah an hralh atanga an hralh thu leh a tui (juice) atangin Rs. 6,44,000/- an lei chhuah tawh thu a sawi a. Kum 2015 atan nasa zawka hmalak chhoh zel a ni a ti.