Vawiin khan Social Welfare Department (SWD) Minister Pu PC Lalthanliana chuan SWD Directorate Conference Hall-ah SWD hnuaia Integrated Child Development Services (ICDS) Review Meeting a neihpui.

Minister chuan Department kalphung leh hma laknaah sum leh pai senso ngai lo pawha hmasawn theihna kawng tam tak a awm thu sawiin, chuti ang hmasawnna nei tur chuan Project tina officer-te chu tan la leh zual turin a ngen a.

SWD hma lakna zauzia sawiin, SWD hnuaiah hian ICDS mai bakah hmasawnna hna tam tak an thawh thin thu leh Department hrang hrangah pawh SWD kal tlanga sawrkar laipui atanga sum tam tak hnuh chhuah a nih thin thu a sawi. Minister chuan naupangte tana nutrition sem thinte chu dik leh felfai taka kalpui thin turin leh a dawngtute pawhin thianghlim leh hrisel nana an hman ngei theih nan uluk leh chik taka thlithlai thin turin a chah bawk.

SWD Minister chuan Mizoramah anganwadi centre eng emaw zat sak thar a, a hlui chhe zualte thawm that a nih tur thu sawiin, chuti anga thawm that ngai turte chu Child Development Project Officer (CDPO) tinte’n report khawm tura tih a nih thu a sawi a. SWD Review Meeting hi kumin July thlaah ICDS chauh ni lo va, kim zawka neih leh a rawt nghal a ni.

He meeting-ah hian CDPO hrang hrangte’n an project hnuaia hmasawnnate leh rawtnate an sawi bakah, Minister hma lakna avanga tun kum 6-7 chhunga an project hnuaia hmasawnna leh infrastructure thar tam tak lo awm ta chu lawmawm an tih thu an sawi hlawm a. Minister chuan officer-te rawtna leh harsatna sawite chu a theih ang anga bawhzui a, hma lak a nih tur thu a sawi.

He hunah hian SWD Secretary Pu Lalthangpuia Sailo, Joint Secretary Pi K.Vanlalrawni leh Director Pi Vanlaldini te leh officer dangte’n Department hmasawnna atan rawtna leh fuihna tha tak tak an sawi bawk a ni.

Minister hian Directorate Office bul hnaia awm, Anganwadi Worker Training Centre leh Female Handicapped Training cum Production Centre te a tlawh nghal bawk.